Ap ka JACATAM haduh 11 tarik

Shillong, 26 Lber:
Ka JACATAM ka la rai ban ap haduh ka 11 tarik Iaiong 2017 ia ka jingkular jong u Myntri Rangbah u Dr Mukul Sangma ban pynkiew tulop 100 percent ia baroh ki nonghikai skul adhoc ha ka jylla kumba u la kular ha ka iing dorbar dang shen.
Ka jingialang jong ka JACATAM kaba long ha kane ka sngi Saitjain ka la shim ia kane ka rai hadien ba la iapyrkhat sani bha.
“Ka JACATAM ha ka jingialang kaba long ha kane ka sngi Saitjain ka la rai ban ap ia ka khubor na ka sorkar haduh ka 11 tarik Iaiong ia ka jingpynbna jong u Myntri Rangbah ban pynkiew tulop 100 percent ia ki nonghikai skul adhoc da kaba shim naduh ka 1 tarik Nailur 2016”, la ong u Publicity Secretary u Babu Kular Khongjirem.
U la ong ba lada ka sorkar kam phah khubor eiei halor kane, ka JACATAM kan pynlong ia ka jingiakhih naduh ka 12 tarik Iaiong da kaba shah thngan.
“Lada ka sorkar (Cabinet) kam pdiang ia kane shwa ka 11 tarik Iaiong, ngin pynlong ia ka jingiakhih da kaba shah thngan naduh ka 12 tarik Iaiong ha Shillong”, la ong u nongkitkam ka JACATAM.