Plie U Dango ia u mawnongrim ka jingkieng ha Maheskola

Mawkyrwat, 26 Lber:
Mynhynnin ka sngi u Myntri ba dei khmih ia ka tnad PWD Roads u Martin M. Dango u la plie ia u mawnongrim jong ka jingkieng Maheskola- Darengiri Roads ryngkat ka jingsynran lang u Zenith M. Sangma Myntri ka tnad Sports & Youth Affairs lem bad ki nongialam jong ka Ranikor Block Congress Committee (RBCC) u bah Jerman Nonsiang ia kaba la pynlong ha ka shnong Chimasora South West Khasi Hills.
Na ka liang u kongsan u Martin M. Dango, haba ai jingkren ha katei ka sngi u la ong ba ia kane ka jingkieng Maheskola – Darengiri Roads kaba dei ka RCC Bridge kaba wan lyngba ka skhim RIDF- XX11 la mang haduh T. 3 klur 8 lak tyngka na ka bynta ban shna iaka bad ka jingjrong jong kane ka jingkieng ka long kumba 24.7 meter eiei.
U la ong ruh ba kane ka jingkieng ka long kaba la rim bha bad ka dei ka jingkieng kaba naduh ka por Sorkar Assam bad kaba la neh kumba palat sanphew snem mynta bad ka jingioh ban maramot bad shna thymmai ia kane ka jingkieng ka long kum ka jingkyrkhu ia ki paidbah kane ka thaiñ ha kaba ki la lah ban leit na kawei ka jaka sha kawei pat ban ia Khaii ia pateng.
Shuh shuh na ka liang jong u, u buh ruh ia ka jingkyntu ia ki paidbah ba ki dei ban don ka jingsngew longtrai ia kane ka jingkieng bad ba ki dei ruh ban iada bad lehkhuid ia kane ka jingkieng kaba ka sorkar ka la shna na ka bynta ka jingdonkam jongki, u la ong ruh ba katba lah yn pyndep kloi ia ka jingshna ia kane ka jingkieng.
Ha kane ka sngi plie ia u mawnongrim la pyniaid ia ka jingialang da u bah F. Sohlang E.E PWD Roads Ranikor ryngkat ka jingiadonlang u Zenith. M. Sangma Myntri ka tnad Sports & Youth Affairs, bah Manstudy Nongrem MDC Langrin Constituency, bah D. Kyndiah Assistant Executive Engnineer Nonghyllam, bah H. S. Diengdoh ADC South West Khasi Hiils, Jerman Nongsiang President Ranikor Block Conggress Committee bad kiwei kiwei.