Pluh ka Petrol Pump ha Nongrim Hills; tasam ka dheng kali

Shillong, 24 Lber:
Mynta ka nohphai sngi kawei ka Petrol Pump kaba don ha Nongrim Hills kaba don mar syndah bad ka Rynjah ka la pluh. Katei ka jingjia la ong ba ka jia ha ka por 4 baje eiei nohphai sngi. La iathuh ba ka jingsdang kem ding jong katei ka Petrol Pump ka dei na kawei ka trok kit umphniang kaba ieng ha katei ka jaka.
Haba ia kren bad u SP City u bah Vivek Syiem u la ong ba katei ka Petrol Pump ka dei kaba long trai da u bah Plostarland Lyngdoh na ka shnong Nongshiliang. Ha katei ka jingjia u la ong ba kam shym la don kano kano ka jingjulor kaba heh lait noh tang ka kali kit umphniang kaba ieng hangtei bad ki kor theh umphniang.
Haduh mynta ki pulit kim pat lah ban ai jingkheiñ ia ki jingjulor ha katei ka jingjia bad ki dang tohkit ban lap ia ka daw bad la iathuh ba tang mar ia kem ding katei ka Petrol Pump kaba don ha ka jaka sah briew, ki paidbah ki la mih na la ki ing ki sem bad ki la lynñiar bad phet shane shatai.
Namar katei ka jingjia la iohi ba da ki phew tylli ki kali pynlip ding na ki dong bapher bapher ka nongbah Shillong ki la her sha katei ka jaka ban leit tem ia ka ding kaba klang. La iohi ruh ba namar katei ka jingjia ka la don ka jingdheng kali kaba jur bha mynta ka janmiet ha kylleng ka nongbah Shillong.