T.3 klur sam skhim ka lok U MDC Mawkynrew

Shillong, 24 Lber:
Ha ka sngi palei jong ka taiew u MDC ka Mawkynrew konstitwensi u bah Banteidor Lyngdoh uba la ju tip kum u bah Paidang u la sam paidbah ia ka skhim kaba T.3 klur tyngka kaba la ioh lyngba ka Special Assistant na ka sorkar pdeng. La sam ia katei ka skhim ha ka jingialang paidbah kaba la long ha phyllaw ing skul jong ka Church of God ha Thangsning. Katei ka skhim kaba la sam ka kynthup ia ki jingtrei bapher bapher naduh ka lynti iaidkjat, pynbha ia ki Community Hall, ki kynroh, ki nala um, ki madan ialehkai, surok Shnong, ki skul jong ki shnong bapher bapher ba hap hapoh Mawkynrew konstitwensi. La sam ia ki work order da u bah Pai ryngkat bad ka kurim jong u ka kong Amanda Pakynteiñ.
Ha kane ka sngi, u Bah Paidang ula buh ka jingtyrwa hakhmat u paidbah na ka bynta ka elekshon MLA-2018 bad ula pan ïa ka jingkyrshan na u paidbah ryngkat jingkular da kaba ong “Lada nga shah jied kum u MLA ha u 2018, ngan nym aireng shuh ïa ka elekshon MDC-2019 namar nga sngewthuh ba ngan nym lah ban shakri ar kynrad”. Kiwei pat kiba la ai jingkren ha kane ka sngi ki kynthup ïa u Bah Kolin Rongtong Sordar rim ka Nongjrong, u Bah Tyngkai S Mynsong Sordar Raid Rngi, Bah Andra Rynjah Sordar Laitkyrhong, Bah Traibor Nongkhlaw Sordar Thangsning, Bah Cresent Lyngdoh President ka Synjuk ki Nongsynshar Shnong ka Mawkynrew Constituency, Bah Seibor Warbah, Secretary Synjuk ki Nongsynshar Shnong ka Mawkynrew Constituency, Bah Daniel Suting ba na Jatah Lakadong bad kiwei kiwei. Ia ka jingialang ha katei ka sngi la pyniaid da u Bah D.L.Nongspung.