Ym shah die jingdie ha ka jingiaseng Assembly ha Sohryngkham

Shillong, 24 Lber:
Ka bor Shnong Sohryngkham lyngba U Sordar Shnong ka pynbna paitbah ba ha kaba iadei bad ka Jingiaseng KJP Assembly ka ban long ha ka Balang Presbyterian Sohryngkham naduh ka 6haduh ka 9tarik Iaiong, 2017 ka mana bad khang ban nym shah ban die jingdie ha ka Sngi U Trai. Kine ki kynthup ia ki nongdie kot, caset, calendar, ki jingbam plastic, ki jingbam khutia bad kiwei kiwei ki jait jingdie.
Yn shah tang ia ki dukan shnong kiba ju plie lypa man ka Sngi U Blei bad ki dukan sha & ja kiba la ioh jingbit, kata ruh kham pajih na ka jaka long Jingiaseng.
Kumta ka Bor shnong ka pyntip paitbah lypa khnang ba baroh kin ioh jingtip. Ki volunteer Shnong kin beh beit ia kiba pynkhein ia kane ka adong bad kan nym don jingkitkhlieh ia ki. Ha kajuh ka por ka Bor Shnong ka pdiang sngewbha ia ki pait riewngeit kiban wan sha kane ka Jingiaseng Bah ba kin poi ha ka jingsuk jingsain, ong ka kyrwoh na U Sordar Sohryngkham U Bah I. Dkhar.