Map ka iing dorbar ia U CEO ka Tura Municipal

Shillong, 23 Lber:
Ka iing dorbar mynta ka sngi ka la map noh bad weng ia ka jingpynshitom ia u CEO ka Tura Municipal u Zenithsky J Sangma hadien ba u la panmap hapoh ka iing dorbar thawain pyrshah ia ka jingujor jongu, ia u MLA ka South Tura u John Leslee K Sangma.
U Zenithsky uba la shah khot hajir ha ka iing dorbar hadien ba ka Privilege Committee ka la lap ia ka jingleh tam jongu, ban pynkhein ia ka kyrdan jong u MLA.
“Nga panmap na u MLA ka South Tura John Leslee K Sangma bad ia ki dkhot ka Privilege Committee”, la ong u Zenithsky hapoh ka iing dorbar.
U Lamphang ka iing dorbar u AT Mondal uba pyniaid ia ka dorbar, u la ong, “Ka iing dorbar ka la pynngat ia phi halor ka jingpynkhein ia ka kabu jong u MLA ka South Tura”.
Shen hadien ba la panmap u Zenithsky, u Lamphang u la pan jingkynthoh na u Myntri Rangbah u Dr Mukul Sangma halor kane. U Myntri Rangbah u la pynpaw ia ka jingsngew phylla namar ba kum kane ka jingjia, ka dei ka sien kaba nyngkong eh ha ka jinglong MLA jongu naduh u snem 1993 haduh mynta.
“Ka dei ka sien kaba nyngkong naduh ba nga long MLA naduh u snem 1993 ban don kum kane ka jingjia. Ai ba kane ka jingjia kan dei ka nuksa hadien habud bad ba kan nym jia biang”, la ong u Myntri Rangbah.
U la ong, “Namar ba u ophisar u la panmap da ka mynsiem baroh, ngin nym iaid shuh shakhmat ban pynngat kam ia u bad weng noh ia ka jingpynshitom”,la ong u Myntri Rangbah.
U la ong ba ki ophisar ki dei ban sngewthuh ba ka iing dorbar ka dei kaba la bynshet kat kum ka synshar paidbah bad ym dei ban jia biang kum kane hadien habud.
Kumjuh u Lamphang u la ong “Namar ba ka iing ka la pdiang ia ka jingpan map jong u ophisar, ia kane ka kam la pynkut noh bad la weng”. Ha shwa ban shah ia u Zenithsky ban mih na jaka ba la pynieng ia u ha iing dorbar, u Lamphang u la bthah ia u ban dem sha baroh ki dkhot ka liangsynshar bad liangpyrshah jong ka iing dorbar.
Shwa ia kane, u James K Sangma u la pynpaw ba um iahap ban khot hajir ha iing dorbar ia u ophisar bad u la mih noh shwa ban shim bishar ia u Zenithsky.
Lah ban kdew ba ka ing dorbar mynta ka sngi, ka la khot hajir ia u CEO ka Tura Municipal u Zenithsky J Sangma katkum ka jinglap ka Privilege Committee ba la ujor da u MLA ka South Tura u John Leslee K Sangma mynshem snem.
Ia ka kaiphod jong ka privilege committee la wanrah da u Saleng A Sangma bad katkum ka kaiphod ka shem ba u Zenithsky u la pynkhein ia ka kabu jong u John Leslee K Sangma kum u MLA bad namarkata un hap ban shah pynshitom.
U Zenithsky u la shah pynshitom hadien ba u la kynnoh ia u MLA ka South Tura ba u pynshit ia ki nongdie madan ha Tura mynshem ha ka por ba khynra ka Municipal ia ki nongdie madan ha katei ka jaka.
Halor Kane u John Leslee u la ujor pyrshah ia u Zenithsky uba long ruh u CEO ka Tura Municipal bad ka Privilege Committee hadien ba la tohkit ka la phah ia ka kaiphod jongka sha ka iing dorbar ban pynshitom ia u Zenithsky.