524 tylli ki transformer kiba sniew tang ha u snem 2016-17

Shillong, 23 Lber:
U Myntri tnad sam ding ka jylla u bah Sniawbhalang Dhar u la pyntip ha ka ing dorbar mynta ka sngi, ba ki don 524 tylli ki transformer kiba sniew tang ha u snem 2016-17 ha kylleng ki jaka ha jylla.
Haba jubab ia ka jingkylli ba la wanrah da ka MLA ka Dikkanchi Shira, u Ma Sniawbhalang u la ong ba ka jingsniew jong ki transformer ka dei na u slap, leilieh, ka jingthang ding palat, ka jingtuh ding ki briew.
Halor ka jingkylli ka Dikkanchi la u Myntri u tip ne em ba ki don ki nongtrei ka MeECL kiba phah sei Pisa na ki nongkynsong ban siew ia ka bai shna ia ki transformer haba ki sniew, u Myntri u la kyntait ba ka sorkar kam don jingtip eiei halor kane.
U la pyntip ruh ha u snem 2013-14 ki don 428 tylli ki transformer kiba sniew, 428 tylli ha u snem 2015-15 bad 492 ha u snem 2015-16. Na kine kiba sniew, tang 1706 kiba la shna pynbha haduh mynta bad ka jinglut ban shna pynbha ia kine ka long T. 307.63 lak bad T. 507.12 lak la thied thymmai ia ki transformer.
U la ong ba ki don ki shnong kumba 250 tylli kiba khlem pat ioh ding, namar ka jingsniew ki transformer ha kaba ka tnad ka dang pyrshang ban shna pynbha ia ki. U Myntri u la kubur ba ki jaka shna ki duna, namar ki don tang lai tylli ha baroh kawei ka jylla kynthup kawei ha Sumer, Dakopgre bad ha Mendipathar. Katkum ka jingong u myntri, lada don ka jingsniew kaba kham jur la phah shna sha ki kompeni shabar.
U la ong ba ka sorkar kan pyrshang ban buh shuh ia ki jaka shna ha man ki district ka jylla hynrei kan shong ha ka jingioh pisa ka sorkar. U la pyntip ba ki transformer kiba sniew naduh 2013-14 haduh 2017 ki long 162 tylli ha East Jaintia Hills, 140 ha West Jaintia Hills, East Khasi Hills 352, West Khasi Hills 142, RiBhoi 295, South West Khasi 106, South Garo 74, East Garo Hills 78, West Garo Hills 294, North Garo Hills 86 bad South West Garo Hills 130.