Nga ap ia ka rai khadduh na ki bor ba halor ka Party: Renikton

Shillong, 23 Lber:
U bah Renikton Lyngdoh Tongkhar haduh mynta um pat sngew lah ngeit ia ka jingpynbna ha ki lad khubor ba ka HSPDP ka la rai ban ai tiket ha u bah Enbin Kharraswai na Mawkyr-wat konstistwensi. “Ka long kaba shisha ba hadien ba nga la ia soh HSPDP, nga dei uwei na kiba pan tiket na bynta ka 2018, ha ka 22 tarik u rymphang ruh ngi dang ia shong jingialang kam pat don eiei kaba kum kata ban shim rai ia ka tiket, hynrei nga kyndit ban iohi ha ki kotkhubor ba ka la don ka jingialang ha ka 18 tarik u lber kaba ngam ioh jingtip eiei bad hangtei ki la pynbna ia ka tiket” ong u bah Renik haba ia kren bad u Rupang lyngba ka phone.
Haba pynpaw ka jingbym sngew shai bad ka jingbym sngew lah ngeit halor ka tiket kumba la pynbna ha ki kotkhubor da u Secretary ka HSPDP Mawkyrwat Area Unit u bah Deling Snaitang, u bah Renikton u la ong ba lada dei ba pynbna tiket ka Party ka la dei ban pynbna lang baroh ha kiwei ki konstitwensi ruh, “Nga tharai ba lada dei por pynbna tiket kin pynbna lang sha kiwei ki konstitwensi, sngew phylla balei tang ha Mawkyrwat” u la ong.
La kylli hato lada u duh tiket un ia khun kum u kyrtong shimet ne un ia soh noh bad kiwei pat ki Party “Haduh mynta ngam pat kwah ban ong eiei, ha ka jingshisha ka don ka Election Committee kaba la pynkupbor da ka CEC jong ka Party ban pynbna ia ka tiket, hynrei haduh mynta nga iohi ba ki pynbna tang ki briew ba na Mawkyrwat, ngan hap ban ap ia ka rai khadduh jong ki bor bahalor jong ka Party, ngan sa kren pat hadien” u la ong da kaba bynrap ba ki don 2 ngut kiba pan tiket na ka HSPDP na Mawkyrwat konstitwensi kata ma u bad u bah Enbin bad ha ka jingialang kaba la long ha ka 22 tarik u rymphang u la ong ba ka jingiakren ka long kaba sngewtynnad bha namar la ia rai ba lada ioh tiket mano mano ruh yn kyrshan uwei ia uwei pat bad ba ki paid nongkyrshan jong katei ka seng ruh ki la hun beit lada ioh mano manor uh uwei napdeng jong ki. Lah ban kdew ba u bah Renikton u la ia khun nyngkong eh ia ka elekshon MLA ha u 2013 na ka Party NPP na Mawkyrwat konstitwensi bad ha katei ka elekshon u la shah rem noh ha u kyrtong ka Congress u bah Rowell Lyngdoh bad u la ioh 4459 vote.