Donkam dorbar kyrkieh halor ka ripod bamsap ha KHADC

Shillong, 22 Lber:
Ka House Committee ba la thaw da ka ïng dorbar ka KHADC ba la khlieh da u nongialam ka liang pyrshah u bah Manstudy Nongrem MDC ka Congress na Langrin ka la pyndep ia ka jingtohkit jong ka halor ki jingkynnoh bamsap kiba ha KHADC kaba la kot haduh T.1.52 klur tyngka ( Shi klur san phew ar lak tyngka) kaba dei ka pisa khajna jong ka Professional Tax kaba la lum na Nongpoh bad Nongstoiñ.
Haba kren sha ki nongthohkhubor mynta ka sngi u Chairman jong katei ka komiti u bah Manstudy, u la ong ba ka komiti ka la dep shong haduh san sien ban bishar bniah ia katei ka kam bad ia kiba dei ban khot hajir la khot hajir lut bad mynta ki la dep ban pynbit pynbiang ia ka ripod bad ia katei ka ripod yn phah noh sha ka ophis jong u Chairman jong ka KHADC u bah L.G Nongsiej ban leh ia kaba donkam.
U bah Manstudy u la ong ba haduh mynta ym pat lah ban pyntip paidbah ia katei ka ripod naba ka dei kaba long trai da ka ing dorbar bad ia kaei kaba don hapoh katei ka ripod yn pyntip beit hapoh ing dorbar. Haba u bah Manstudy um shym treh ban iathuh ia kaei kaba ka komiti ka la lap, la kylli na u hato katkum ka jinglap jong ka komiti ka i donkam ne-em ba dei ban khot kyrkieh noh ia ka dorbar kyrpang, “Donkam ban khot kyrkieh noh ia ka dorbar kyrpang, ngin ai jingmut ia u chairman ba un khot noh” ong u bah Manstudy.
Ki dkhot jong katei ka House Committee ki kynthup ia ka nongialam jong ki MDC ka HSPDP ka kong Teilinia Thangkhiew, nongialam ki MDC ka UDP u bah Teinwell Dkhar, nongialam ka KHNAM bah Adelbert Nongrum bad katei ka komiti ka la pynrung ruh ia u bah V.G Kynta u stad-aiñ kum u dkhot jong ka ban iarap tohkit ia katei ka kam.
Lah ban kdew ba ka la don ka jingpynrung ia ka pisa jong ka Professional Tax jong ka KHADC ba la iohlum na Nongpoh bad Nongstoiñ Branch bad katei ka mat ka la khih win bha ha ing dorbar District Council ha kine ki khyndiat sngi ba la leit, ka la don ruh ka kynhun tohkit ban tohkit ia katei ka kam hynrei ka ing dorbar kam hun ia ka ripod bad ka la thaw da ka kynhun tohkit jong ka ing dorbar.