T. 57 klur tam sah ka bhah ki District Council ha ka sorkar

Shillong, 22 Lber:
U MLA ka Mawsyn-ram u Bah Pynshngain N Syiem u la byrngem ban leit kiew sha iing kashari lada ka sorkar jylla ka dang iai leh meinah ban nym pynlait thikna ia ka bhah pisa kaba dei jong ka district council.
Haba wanrah ia ka jingkylli hynne ka sngi hapoh ka iing dorbar, u Bah Pynshngain u la ong, “Lada ka sorkar kam pynlait pura ia ka bhah pisa jong ka district council, ngin hap ban leit tied jingkhang sha ka Kashari”.
U la ong ba ka sorkar jylla ka dei ban sngewthuh ba ia ka bhah ka district council ka dei kaba la pynkhamti da ka riti synshar ka ri India bad ka dei ka kamram ka sorkar banpyndep hok ia ka kamram.
U Bah Pynshngain u la kynnoh ba u Myntri ka district council affairs u Bah Prestone Tynsong u khlem kreh kot bha shwa ban wanrah ia ka jubab hapoh ka iing dorbar bad u la ai jingkhein bakla.
U la ong ba ha ka jiingshisha, ka sorkar ka dang dei ban pynlait ia ka bhah pisa basah sha ki district council ka long T.130 klur tam na ka jingioh lum khajna na u dewiong, mawshun.
Halor kane, u myntri ka tnad district council affairs u Bah Prestone Tynsong u la ong ba haduh mynta ka pisa ba dang sah ba ka sorkar jylla kam pat pynlait sha ki district council ka T.57,00,34,755 klur kynthup ka KHADC, JHADC bad ka GHADC.
Kane ka pisa kaba dei ban ioh da ki district council ka dei ka bhah na ka major mineral kaba mut na u dewiong, mawshun, la ong u Bah Tynsong.
U Myntri ka tnad district council u la ong ba na ka bynta ki minor mineral ka sorkar ka la pynlait lut sha ki district council.
Katkum ka jingong u myntri, ka pisa ba dei bhah ban ioh ka JHADC ka long T. 20,57,88,586 klur, ka KHADC ka long T.36,42,46,169 klur. Hynrei ia ka GHADC la dep pynlait lut kata T.64,97,185 klur.
Halor ka jingbyrngem u Bah Pynshngain ban leit sha Kashari, u bah Tynsong u la ong ba lada u bah Pynshngain um hun, um lah ban khang ba un leit sha Kashari.
U la kyntait ia ka jingong u Bah Pynshngain ba ka sorkar ka leh meinah ia ka district ha ka jylla. “Ka sorkar jylla kam ju leh meinah ia ki district council bad ka pynlait beit ia ka bhah katkum ba la pynkhamti ha ka riti synshar ka ri”, la ong u Bah Tynsong.