Ki iing Meghalaya kim mang kyrpang ia ki samla pule

Shillong, 22 Lber:
Ka jingbuh ia ki ing Meghalaya house shabar jylla ka long ia ka leit ka wan jong ki heh sorkar kynthup ki Myntri, ki babu sorkar hynrei ia ki paidbah bad ki samla pule kan shong lada lait ki kamra, la ong u Myntri ka General Administration u bah HDR Lyngdoh ha ing dorbar.
Haba jubab ia ka jingkylli u MLA u John Leslee K Sangma, U bah HDR Lyngdoh u la ong ba ki don 147 ngut ki nongtrei ha Meghalaya house ha New Delhi, Kolkata, Mumbai, Vellore bad Guwahati katba ki nongaibam ki don 88 ngut.
Nalor kine, la don 24 tylli ki Kali kynthup 13 ha New Delhi, 8 ha Kolkata bad mar kawei ha Guwahati, Mumbai, bad Vellore.
Halor ka jingbym ioh jingbam tynrai na Meghalaya ha kine ki iing khamtam ki dohkha tyrkhong, u Myntri u la ong ba un peit ia kane ban pynthikna ba ki paidbah Meghalaya kin ioh bam Dohkha ha kitei ki ing.
Shwa ia kane u MLA u Saleng K Sangma u la dawa ba ka sorkar ka dei ban ai pyniaid canteen noh ha ki samla bym ioh kam ka jylla kiba la pyndep ia ka jinghikai ha ka hospitality bad ym dei ban ai ha ki briew nabar jylla.