Ki nongap khyrdop ha Secretariat, shu ai wai nabar

Shillong, 22 Lber:
U MLA ka Sohra u Bah TW Chyne mynta ka sngi hapoh ka ing dorbar u la pynpaw ia ka jingsngew khia ia ka jingai wai ka sorkar ha ki riew shimet ban ap khyrdop ha Secretriat kaba dei ka jaka ka jabieng jong ka jylla.
Haba wanrah ia kane ka mat ha ka ing dorbar u Bah Chyne u la ong, “Kumno ka sorkar ka lah ban shu ai wai kat ia ka kam pahara ban ap khyrdop ha Secretariat kaba dei ka kamram jong ki pulit”.
U la ong ba kane ka jingleh ka sorkar ka long kaei kaei kaba lah ban ktah bad um sngew iahap ia kane ka jingleh ka sorkar.
U MLA u la kren ruh ia ka jingbym don ki jaka ap ia ki heh ki hain haba ki leit donkam ha Secretariat khamtam ia ki MLA kiba thmu ban leit kynduh ia ki myntri sorkar ha kaba ki hap ban shu ap kum ki riew paidbah shabar.
Ym tang kane, u MLA u la pynsngew ruh ba ka phyllaw ka Secretariat ka dei kum ka jaka set kali jot namar ba la khapngiah ki kali bad kane ka la wanrah ia ka jingbym itynnad bad ka jingjaboh bad pynsniew dur ia ka Secretariat.
“Ka Painkhana ha Secretariat ruh kaba la rim bha kum ka juk barim bad ka donkam ban pynthymmai ia kane”,la ong u MLA ka Sohra.
Haba jubab ia kane, ka myntri ka Deborah Marak ka la ong ba ka sorkar ka la ai wai ha ki riew shimet tang ban shu long nongplie hynrei ym ia ka kam pahara la leh da ki pulit
Ka la kubur ia ka jingong u MLA ba ka phyllaw ka Secretariat ka dei ka jaka set kali jot bad ka la kynnoh ba kane ka dei namar ba ka tnad pyniaid kali kam ju patiaw ban pynkhuid ia ki kali ba la rim watla ka la thoh bunsien ba kin leh ia kane ka kam.
“Nga mynjur ba ka phylla ka Secretariat ka dei ka jaka set kali jot bad ka daw ka dei namar ba ka tnad pyniaid ka slem palat ban leh haba la dep ai jingthoh man ka por ba kan pynkhuid noh ia ki kali rim”,la ong ka myntri.
Ka la kular ruh ba kan shimkhia lada don kamra ban buh kum ka MLA room khnang ba ki MLA kiba leit kynduh ia ki myntri sorkar ha Secretariat kin shong jahthait.
Ka la kular ruh ban peit ia ka jinglong jingman ki painkhana ha Secretariat kumba lapynsngew da u MLA ka Sohra.