Mynjur u Lat ia u bah Latiplang kum u EM, lah ban ioh tnad khaii pateng

Shillong, 20 Lber:
Hadien ba la sahkut la bun bun bnai, hynrei mynta ka sngi Lat ka jylla u la mynjur ia ka kyrteng u bah Latiplang Khar-kongor MDC ka Nong-thymmai kum u Executive Member ka KHADC. Haba ia kren bad u bah Latiplang u la iathuh ba u la ioh jingtip ba u Lat u la mynjur, haba la kylli ka tnad aiu un bat ha District Council, u la jubab ba haduh mynta um pat tip.
Katkum ka jingioh-lum khubor la iathuh ba u bah Latiplang un bat ia ka tnad kaba heh kaba lah ban dei ka tnad Elaka ne ka khaii pateng kaba u la ju bat teng mynshuwa ha ka por ba dang long CEM u bah Ardent M Basaiawmoit bad bah Adelbert Nongrum. Lah ban pynkynmaw ba ha ka por ba u bah Latip u la bat ia ka tnad khaii pateng ka iew ka hat ka la khihwin bad ka jingkhynra laisen khaii ka la jur bha ha katei ka por. Ka jingwan phai biang u bah Latiplang sha ka EM ka dei hadien katto katne tylli ki shuki EM ka KHADC ki la sah thylli noh hadien ka jingrisaiñ ki MDC Congress kiba la weng noh ialade na ka PDF.
Lah ban kdew ba ki la don ar tylli ki shuki EM ba lait hadien ka jingrisain u bah P.T Sawkmei na ka kam Dy.CEM bad bah Lamphrang Blah na ka kam EM Elaka hynrei kawei la pyndap bad ka dang don sa kawei kaba dang sah. Ka kam Chairman kaba la thylli hadien ka jingrisain u bah Manstudy Nongrem la pyndap da u bah L. G Nongsiej hynrei ia ka kam Deputy Chairman ym pat shym la lah ban pyndap naduh ka jingrisain jong u bah Donevan Kharwanlang MDC ka Sohra konstitwensi. Ki lad khubor ki la iathuh ba ia kitei ki shuki kiba dang sah thylli u CEM u dang ia kren ban ai bhah ia ki MDC ka HSPDP kiba donlang mynta hapoh PDF.