Dang eksamin ka sorkar ia ka block

Shillong 20 Lber:
Ka sorkar kam pat lah rai ban buh ia ka Block Mawlai, namar ba ki don lai tylli ki jaka ba la tyrwa sha ka sorkar, la ong u Myntri ka tnad Pynroi nongkyndong u bah Sniawbhalang Dhar ha ing dorbar mynta halor ka jingkylli ba la wanrah da u MLA ka Mawlai Bah Embhahlang Syiemlieh.
“Ngi la ioh biang lai tylli ki jaka kynthup ha Mawtawar, Mawsiat-khnam bad ha Mawpat ban buh ia ka ophis ka Block”, la ong u Myntri.
Katkum ka jingju-bab u Myntri, haduh mynta ka sorkar ka dang eksamin bha ia kine ki jaka bad kan sa rai.
“Ngi dang eksamin ia ka jaka ban buh ia ka ophis Block”, la ong u bah Sniawbhalang.
Ha kawei ka liang, u MLA ka Nongthymmai u Dr Jemino Mawthoh haba shim bynta halor kane, u la ong ba ka saw ngut ki MLA kynthup ma u, u MLA ka Pynthorumkhrah u bah AL Hek, u MLA Mawryngkneng u bah David Nongrum bad u Bah Embhahlang Syiemlieh ki la mynjur lang ban buh ia ka ophis ka Block ha Mawlai Mawroh namar ba kham long ia baroh.
Katba u Bah Embhahlang u la ong ba ka sorkar kam dei ban rah shabar u pud u sam ka Mawlai ia ka ophis ka Block.