23 tarik khot hajir ka Ing dorbar, ia u CEO ka Tura Municipal

Shillong, 20 Lber:
Ka ing dorbar mynta ka sngi, ka la pdiang ban khot hajir ia u CEO ka Tura Municipal u Zenithsky J Sangma katkum ka jinglap ka Privilege Committee ba la ujor da u MLA ka South Tura u John Leslee K Sangma mynshem snem.
Haba pynbna mynta ka sngi, ha ing dorbar, u Lamphang u AT Mondal u la ong ba u CEO u dei ban wan hajir ha iing dorbar ha ka 23 tarik mynta u bnai khlem pep. “Ka shithi lyngba ka tnad ba dei peit ka dei ban pynpoi sha u Zenithsky J Sangma mardor”, la ong u Lamphang.
Ia ka kaiphod jong ka privilege committee la wanrah da u Saleng A Sangma bad katkum ka kaiphod ka shem ba u Zenithsky u la pynkhein ia ka kabu jong u John Leslee K Sangma kum u MLA bad namarkata un hap ban shah pynshitom.
U Zenithsky u la shah pynshitom hadien ba u la kynnoh ia u MLA ka South Tura ba u pynshit ia ki nongdie madan ha Tura mynshem snem, ha ka por ba ka don ka jing khynra ka Municipal ia ki nongdie madan ha katei ka jaka.
Halor kane u John Leslee u la ujor pyrshah ia u Zenithsky uba long ruh u CEO ka Tura Municipal bad ka Privilege Committee hadien ba la tohkit, ka la phah ia ka kaiphod jongka sha ka iing dorbar ban pynshitom ia u Zenithsky.