17299 kiba pep skul shiteng por

Shillong, 20 Lber:
Ka Myntri ka tnad pule puthi ka jylla ka Deborah Marak ka la ong ba ki don haduh 17299 ki kynnah kiba pep skul shiteng por ha jylla jong u snem 2016-17.
Haba jubab ia ka jingkylli ba la wanrah da ka MLA na liang synshar ka Dikanchi Shira mynta ka sngi, ka Marak ka la pyni ruh ia jingdon kiba pep skul jong u snem 2017-18 kaba kot sha ka 12406 ngut ki khynnah. Kiwei pat ki snem ki long, ha u snem 2013-14 kiba pep skul ki long 33557 ngut, ha u 2014-15 ki long 31276 ngut, ha u 2015-16 ki long 14957 ngut. Ka jingdon jong ki khynnah ba pep ki skul jong u snem 2016-17 ki kynthup ia ka East Khasi Hills 662 ngut, West Khasi Hills 4508, South West Khasi Hills 874, Ri Bhoi 1041, East Jaintia Hils 692, West Jaintia Hills 1440, East Garo Hills 886, North Garo Hills 1316, West Garo Hills 592, South West Garo Hills 241 bad South Garo Hills ki don 164 ngut.
Katkum ka jingong ka Myntri ka daw ka jingpep skul ka long namar ka jingduk, ka jingduna ka bor jabieng, ka jingphiel bunsien, ka jingbym biang ki skul, ka jinglong ki nonghikai, kiba hap ban peit Para, bad ka jingphet shnong. “Ka jingpep skul ka kham jur ha ki shynrang ban ia ki kynthei”, la ong ka Myntri.
Halor ka jingkylli kiei ki lad ba ka sorkar ka shim ban weng ia kane ka jingeh, ka Marak ka la ong ba ka sorkar ka la shim ia ki lad ki lynti kynthup ka jingbuh ia ka jaka hikai ban hikai ia kiba pep skul, ka jinghikai ia ki nonghikai ha kane ka bynta.
Ka Myntri ka la ong ba ka sorkar ka la pynlong ia ka jingpynshai paidbah khamtam ia ki Kmie ki kpa, ka jingpynrung skul ia kiba pep skul. Ka sorkar ka la buh ruh ia ka jaka hikai ia ki kynnah ha ki skul bapher bapher ha ka jylla da kaba iateh bad ki Seng.
Ka ai kot, uniphom, ka ja sngi la ai ei bad pynbiang Kali ban leit shaw bad leit on ha ki jaka ba jynjar. Nalor kine, la ai jinghikai ruh ia ki khynnah ha ki jait kam bapher bapher bad ka jingkular aikam.
Ki don 74 tylli ki jaka hikai kyrpang ha East Khasi Hills, 45 ha West Khasi Hills, 39 ha South West Khasi Hills, 43 ha Ri Bhoi, East Jaintia Hills 8, West Jaintia Hills 65, East Garo Hills 24, North Garo Hills 21, West Garo Hills 68, South West Garo Hills 18 bad ka South Garo Hills 13 tylli bad baroh ka long 418 tylli.