Ha thain Huroi, leit shah sumar sha Bangla

Shillong, 20 Lber:
U MLA ka Sutnga u Bah Hopeful Bamon u la ong ba ki paidbah ha thain Hingiria, Huroi ba don ha khappud bad ka Bangladesh, ki leit shah sumar, leit shim dawai sha Bangladesh bad ka daw ka long ba ki jaka sumar kiba don ha ka thain ki don sha jngai bah.
Haba kren mynta ka sngi, hapoh ka ing dorbar u bah Bamon u la ong “Ki briew katei ka thain ha khappud ki shah pynbor ban leit shim dawai ban shah sumar sha Bangladesh namar ka jingbym don ki lad sumar ha ka thain”.
U la ong ba ki dorbar shnong, ki sengbhalang bad ma u ruh kum u MLA, u la ai dorkhas sha ka sorkar ban pynbha bad ban kyntiew kyrdan ia ki sub-centre sha ka PHC, sha ka Sub-centre hynrei khlem lerkam haduh mynta. U la dawa ba ka sorkar ka dei ban peit ia kane ka jingeh jong ki paidbah halor ka koit ka khiah jong ki paidbah.