Duh kamai ka MCCL, bym don byrni

Shillong, 17 Lber:

U MLA ka Sohra u bah TW Chyne u la ong ba ka long kaba sngew thamalu ban wanrah haduh ka iing dorbar tang namar ba duna byrni song dewbilat khamtam na u Myntri Rangbah hynrei ka jingleh sting ki bor ka MCCL ym banse.

Haba wanrah ia kane ka kam ha ing dorbar mynta ka sngi, u bah Chyne u la ong ba kamai kompeni sorkar MCCL ka ktah jur tang namar bym don byrni ban thep dewbilat ban pyniaid sha iew.

“Kaei ka jingmut ban thung chairman, vice chairman, managing director haba tang ia ka byrni song ruh kim lah ban shim rai” la ong u MLA ka Sohra.

“Hato ka dei ka kamram jong u Myntri rangbah ban peit wat tang ia ka byrni ruh”, la ong u MLA ka Sohra.

U la ong ba mynta ki trok kiba thmu ban kit dewbilat MCCL ki hap ban shu shong thiah sngi, namar ba ym don byrni ban song dewbilat bad kane ka ktah jur ia ka kamai kajih ka MCCL tang na ine i daw barit.

“Hato ki chairman, vice chairman, managing director ki shu shong jahthait ha MCCL”, la buh jingkylli u MLA ka Sohra.

U la ong ba lada ka sorkar ka ai kontrak ha u kontraktor ban pynpoi byrni u bym lah ban pynbiang, ka bha ban weng bad ban ai ha kiwei kiba lah.

Halor kane u Myntri rangbah u Dr Mukul Sangma u la ong ba ka kam sorkar ka shim por ban shim rai bad kam long kumba long ki kompeni shimet.

“Kano kano ka kompeni ba pyniaid ka sorkar kan iai kynduh kum ia kane ka jingeh”, la ong u Dr MukuL.

U la ong ba ka kompeni kumba long shawei ki jylla bad ki ri, la dei ban aiti ban pyniaid ki riew shimet bad ka sorkar kan shu iarap.

“Kumba long ka MTC, MeECL ki kompeni sorkar kin iaid mad ia kum kane ka jingeh”,la ong u Myntri Rangbah.