Rai ban mih paidbah ha ka 18 Tarik

Nongpoh, 15 Lber:

Tang hadien ba la mih ka jingthmu ban rah noh ia ka Iew Umsning sha Patarim, mynta ka sngi ki paidbah nongshong shnong ka Umsning Proper-B, ki la pynpaw ia ka jingsngew pyrshah kaba jur halor ka jingthmu jong ka Umsning Town Dorbar (UTD) ha ryngkat bad ka KHADC ban pynkynriah jaka ia katei ka Iew kaba la rim bha ha Ri Bhoi.

Haba shimkhia halor jong kane ka jingpyrshah, na ka liang ki nong shong shnong ka Umsning Proper-B ia kaba la ialam khamt da u Bah Wonding Thawbri, u Bah T Mylliem bad u Bah D Kharmaw, ha kaba ka daw kaba la pynlong ia ki paidbah ban pyrshah halor katei ka jingthmu ban rah ia ka Iew Umsning sha Patarim, ka dei namar ka jingleh lyndet da ki nongialam shnong, khlem da kynjoh ktien ia ki paidbah nongshong shnong.

Kumta haba iadei bad katei ka jingthmu, na ka liang ki paidbah nongshong shnong ki la kynntu ia u Paiem Ricky lem bad ia ki myntri ba kim dei ban ailad halor katei ka jingthmu jong ka UTD bad KHADC ban rah ia ka Iew Umsning sha Patarim.

Kum ka jingpyrshah halor katei ka jingthmu ban rah ia ka Iew Umsning sha Patarim, na ka liang ki paidbah nongshong shnong ka Umsning Proper-B, ki la rai ruh ba kin pynlong da ka jingiaiaid paidbah ha ka 18 Tarik mynta u Bnai, kaba long kum ka jingpyrshah namar ha katei ka sngi ka la don ka jingthmu ban iateh soskular hapdeng ki nongialam ka UTD bad KHADC.