Poi um biang ha Lad Mawreng, Mawkalun

Shillong, 15 Lber:

Ha shwa ban kut ka jing ai por kaba shitaiew ia ka tnad PHE bad ka Company BSC kaba shna ia ka Surok ar kali na Ladmawreng shaduh 7th Mile, Upper Shillong, mynta ka sngi ki paidbah nong shong Shnong jong kitei ki shnong, ki la ioh mad ia u soh uba thiang ba ki jingdawa jong ka FKJGP Upper Shillong Circle & KSU Upper Shillong Circle ki la urlong da ka jing shimkhia bad ka jing iatreilang naduh ka tnad PHE, PWD & BSC Company ha ryngkat kitei ki Seng Bhalang kiba la pynlong ia ka jing ia jurip ryngkat mynta ka sngi.

Kane ka jingjurip, kaba long mynta ka sngi, ka la long kaba iaid beit iaid ryntih bha namar la wan ban ia shim bynta lang naduh ki Executive Engineer jong ka tnad PHE (Electrical, Distribution, Division II), SDO jong ka PWD, National Highway, Engineer Company BSC, Rangbah Shnong jong ka Shnong Lad Mawreng, Mawkalum bad kumjuh ruh na ki Dkhot jong ka Committee Shnong.

Ha kane ka jing ia leit jurip, la lap ba na ka liang jong ka PHE Department ka la shimkhia shisha namar ba mynta ka sngi ki la lah lut ban pyndep ia ki nar um baroh ban sam um sha ki paidbah Nong Shong Shnong jong ka Shnong Lad Mawreng bad Mawkalum, wat la ka long makna ka jing pynbiang kaba tang shipor (Temporary) ia mynta hi, katba ka dang iaid ka jing shna ia ka Surok.

Na ka liang jong ki Executive Engineer jong ka tnad PHE (Electrical, Distribution, Division II) ki la pyntikna ba nangne shakhmat ki paidbah kin ym mad shuh ia kine ki jingeh lyngba ka jingiatreilang, ka PWD, National Highway bad Company BSC pat ki la ai ka jingkular ba nalor ka Surok yn pynshna ruh ia ki lynti iaid kjat, ha baroh ki jaka kiba i donkam hadien ba na ka liang jong ki nongialam jong ka FKJGP Upper Shillong Circle & KSU Upper Shillong Circle ha ryngkat ki Rangbah Shnong kila pynpaw ba ka don ka jingma ia ki paidbah lada ym don ki lynti iaid kjat kiba shngain.