Ban khang shalan masi sha Bangla ka dei ka kam ki BSF

Shillong, 10 Lber:
U Myntri rangbah u Dr Mukul Sangma u la ong ba ka kam ban khang ia ka jingshalan tuh ia ki masi sha Bangladesh ka dei ka kamram jong ki Border Security Force (BSF) bad ka tnad Custom ka sorkar India, ym ki Pulit ka jylla.
Haba jubab ha ing dorbar halor ka jingkylli ba wanrah da u MLA ka Nongkrem u bah Ardent M Basaiawmoit mynta ka sngi, u Dr Mukul ula ong ba lada ki pulit kin leit ban tuklar man ki jaka ba kit masi ka long kumba pyndik bein ia ki nongkhaii ha jylla.
U la long ba ki don bun bah ki paidbah kiba thied masi, namar ba ka jylla Meghalaya ka dei ka jylla bamdoh.
“Kumno ngin khang ia ka jingthied masi, ka jingbam ki briew. Ia ki masi la shalan kylleng ki jaka ka meghalaya. Hynrei lada shalan sha Bangladesh, kan dei ka kamram ka sorkar pdeng”, u la ong.
U la ong ba naduh 2011-16, la kurup masi ba thmu shalan tuh sha Bangladesh tang 8000 tylli na ki 28 tylli ki jinglap bad ia kane ka jingtip la ai da ki BSF sha ki pulit ka jylla”.
Ula ong ruh ba ka kamram ka sorkar jylla ka long tang ban kyntu ia ka sorkar pdeng ba kan pynkhlain ia ka jingpahara ha khappud.
“Ngi la kyrpad ia ka sorkar pdeng ba kan phikir bha ia ki khappud bad na ka liang ka sorkar pdeng ka la kyrpad ia ngi ban ai jaka ban buh ia ka Battalion ban pynkhlain pahara”, la ong u Dr Mukul.
Na ka liang u bah Ardent u la ong ba ka sorkar kam lah ban thet kti halor kane, hynrei ka dei ban shim khia.