T. 2 lak ia kiba iap, T. 50 hajar ia kiba mynsaw ai ka ophis u MRD

Shillong, 08 Lber:
Ka ophis jong u Myntri Rangbahduh ka ri ka la pynnoh jingiarap mar T. 2 lak sha ki longiing jong kito ki briew ba la khlad noh ha ka jingjia aksiden ha Nongspung, ka West Khasi Hills bad mar T. 50 hajar sha kiba mynsaw.
Ia kane la iathuh u myntri kam pohiing ka jylla u Bah HDR Lyngdoh haba jubab ia ka jingkylli ba la wanrah da u MLA ka Rambrai u Bah Phlastingwell Pangniang hapoh ka iing dorbar mynta ka sngi.
U Bah HDR Lyngdoh u la iahthuh ba na ka liang jong ka sorkar jylla pat kan ai jingiarap T. 50 hajar ia kiba iap bad T.10 hajar ia kiba mynsaw, kiba ngat ha katei ka jingjia ba sngewsih ha kane ka jingkylla kali.
U myntri u la ong ba la pynngat ha ka ain ia u nongniah bad yn sa kem ynda u la mih na jaka sumar namar ba mynta u dang shah sumar ha Civil Hospital Shillong.