T.2.779 klur ioh khajna ka sorkar na ka CSR ki kompeni

Shillong, 08 Lber:
U Myntri Rangbah ka jylla u Dr Mukul Sangma u la ong ba ka sorkar jylla ka la ioh jingmyntoi haduh T. 2.779 klur na ki kompeni na ka Corporate Social Responsbilities (CSR) ne ki kam ba ki leh na ka bynta ka bha ka miat jong ka imlang sahlang.
Haba jubab ia ka jingkylli ha iing dorbar ba la wanrah da u MLA ka Nongthymmai U Dr Jemino Mawthoh mynta ka sngi u Dr Mukul Sangma u la ong ba kane ka T.2.779 klur ka dei jong u snem 2015-16 kaba la ioh na ki 6 tylli ki kompeni kiba don ha kane ka jylla.
Katkum ka jingong u Myntri Rangbah ki kam ba kine ki kompeni ki la leh na ka bynta ka imlang sahlang ka long kum ka jingthung dieng, ka jingshna lynti iaid, ka jingbuh ia ki jaka sumar ia ki paidbah bad bun kiwei pat.
U la ong ba kane ka pisa ba ki la siew sha ka sorkar ka dei katkum ka kyndon 135 jong ka Companies Act 2013.
U la ong ba wat la ka sorkar jylla kam pat pynkylla ia ka Industrial and Invesment Promotion Act 2012 hynrei kine ki kompeni ki la siew ia kane ka CSR lyngba ka jingshim khia ka sorkar ha kaba ma u, shimet kum u myntri rangbah u la khot ia ka jingialang jong ki heh ki kompeni bapher bapher kiba don ha kane ka jylla ba ki dei ban pynbiang ia ka CSR katkum ba la buh ka sorkar.