La sangeh ka sam tin, ong u myntri

Shillong, 08 Lber:
U myntri ka tnad shna iing ka jylla u Zenith M Sangma mynta ka sngi u la ong ba ka sorkar ka la pynduh pyndam noh ia ka skhim sam tin sha ki briew ba duk naduh u snem bad ha jaka jongka, la pynmih da kawei ka skhim kaba la tip kum ka Chief Minister Housing Assistance Scheme kaba thmu ban ai skhim ban shna iing.
Haba jubab ia ka jingkylli ba la wanrah da u MLA ka Mawshynrut u Bah Witting Mawsor hynne ka sngi ha iing dorbar, u Zenith u la ong ha kane ka Chief Minister Housing Assistance Scheme ki don ar bynta kawei na ka bynta ban shna iing ha ka jinglut kaba T. 3.10 lak ban ai sha ki briew ba kham duna ka jingkamai bad kawei pat ban pynbha ia ki iing.
Hynrei u Myntri u la ong kane ka skhim ka dang don hapdeng ka jingpynkhreh ka sorkar bad kam pat shym la pyntreikam namar ba kam pat lah ban pynbiang ia ki jingdonkam.
U la ong ba ka don ruh ka skhim ka sorkar pdeng kaba kyrteng ka Pradhan Mantri Awaas Yojana (PMAY) kaba thmu ban ai iing baduk sha ki nongshong shnong bad kane ka skhim ka la treikam mynta ha ka jylla.