100ngut shah weng kam, ki nongtrei shipor ka PWD

Shillong, 7 Lber:
Ki nongtrei shipor lane ki Officiate jong ka tnad PWD Road and Building mynta ka sngi ki la leit ban ia kynduh ia u myntri rangbah ka jylla u Dr.Mukul Sangma bad ia kitei la ialam da ka President jong ka Mahila Congress na kane ka jylla ka kong Joplin Shylla. Katei ka jingiakynduh jong ki ka long ban pynsngew ha u Dr.Mukul ia ka jingeh ba ki ia kynduh namar ka jingshah weng kam kynsan kynsan ha ka sorkar kaba la ktah lut ia ka kam ing ka sem jong ki.
Kitei ki nongtrei shipor ka PWD ki la ai ruh da ka jingthoh sha u Dr.Mukul ban pynpaw ba kane ka jingweng kam kynsan kaba tang da ka ktien kaba la pynsngew sha ki ka la treikam tang hapoh ri Lum Khasi bad Jaintia katba ha ri Lum Garo baroh ki nongtrei shipor ki dang trei ia ka kam jong ki.
Ki la dawa ruh ba u myntri rangbah u dei ban ailad ia ki ban bteng biang ia ka kam ba ki trei namarba kumba ka long mynta ka snem jong ki ruh ka la heh namarba don na ki kiba la trei la palat ia ka 30 snem kum ki nongtrei shipor hynrei kiba bun hi ki trei palat ia ka 5 snem bad kim lah shuh ban leit trei da kiwei pat ki kam.
Haba kren sha ki nongthohkhubor u General Secretary jong ka All Meghalaya Officiating Employees PWD Road and Building Association u bah Barristar Roy Thabah u la ong ba ki nongtrei kiba la shah weng kam kynsan ki la palat ia ka 100 ngut bad la weng kam ia ki tang da ka ktien ha u naiwieng, 2015 bad naduh katei ka por kim shym la ioh ia ka tulop ruh kaba shisnem tam.
Ka kong Joplin Shylla President Mahila Congress ka la ong ba bun na kitei ki nongtrei ki la pynpep skul noh ia ki khun jong ki ruh namarba ka la ktah ia ka jingioh kamai jong ki. Ha katei ka jingialang kaba la wan ban ia shim bynta da ki phew ngut ki nongtrei shipor la donlang ruh u bah D.D Lapang nongaibuit ka sorkar, u Martin M Dango myntri ka tnad PWD bad kiwei pat ki heh sorkar.