Ym thikna ka sorkar, ki jaka rung jaka mih

Shillong, 07 Lber:
Ka sorkar jylla kam pat lah ban pynthikna lano kan pyndep ia ka jingshna ia ka jaka rung bad jaka mih kumba la iarai bad ki seng bhalang ban tehlakam ia ka jingwan ki briew nabar.
Haba jubab ia ka jingkylli ba la wanrah da u MLA ka Nongkrem u Bah Ardent M Basaiawmoit hynne hapoh ka iing dorbar, u Myntri Rangbah u Dr Mukul Sangma, u la ong ba ka sorkar ka la pynkhreh shaid shaid ban pyndep shwa ia ka jingshim jaka ban shna ia ka jaka rung bad jaka mih.
“Ka jingpyndep ia ka jaka mih bad jaka rung ka dang iaid ha ka jingpynkhreh shaid shaid”, la ong u Dr Mukul.
U la ong ba ka sorkar ka la iaid khlem sangeh ban pyndep ia kane kam watla kala don ka jingeh khamtam haba iadei bad ka jingshim jaka namar ka jingtreikam ka ain ka sorkar pdeng ka Right to Fair Compensation of Land, ha kaba ka sorkar ka hap ban bishar bniah bad iaid katkum kane ka ain.
Ha kajuh ka por, u la iathuh ba ka sorkar ka la pynlait ia ka pisa ban siew ia ki trai jaka ba la dep ban pynbiang nadong shadong sha ki tnad ba dei peit halor kane.