Jan pluh ka Iew Umsning

Nongpoh, 6 Lber:
Mynta ka janmiet ha ka por 4 baje ei ei, ka la don ka jingpluh jong ki dukan ha Iew Umsning bad ha kane ka jingpluh haduh 5 ne 6 tylli ki dukan kiba don ha katei ka Iew ingkhong bad haba khein kyllum lang baroh ki jinglut jingsep ka la poi sha ki lak tyngka.
Haba pyntip sha ki nongthohkhubor, u Bah Rocky Marwein Rangbah Shnong ka Umsning Proper B, u la ong ba ia ka daw kaba la pynlong ia katei ka jingpluh jong katei ka Iew ym shem la lah ban tip, namar ka la shu pluh kynsan kynsan.
U la ong ruh, donbok ba katei ka ding kam shem la lap ban klang sha kiwei pat ki dukan, namar ka jingiarap da ki paidbah bad ruh ka jingkloi jong ka kali pynlip ding na Umiam ban wan pynlip noh ia katei ka ding.
Kumta hadien kane ka jingiai jia ki jingpluh ding ba khah khah, na ka liang ka Dorbar Shnong Umsning proper A bad Proper B, ki la buh ruh ka jingkyrpad ia ka sorkar bad nongmihkhmat ba kin phai khmat lem na ka bynta ban buh noh iaka Sub Fire Service Station ha Umsning, khang ba yn lah ban tehlakam lada jia ba don kino kino ki jingjia pluhding ha ki thain Umsning.