Jngoh U MP ka Tura, ia kiba mynsaw hap kali ha Nongspung

Shillong, 06 Lber:
U MP ka Tura u Conrad K Sangma hynne ka sngi u la leit ban jngoh ia kiba mynsaw kiba thiah pang ha NEIGRIMS na ka jingjia aksiden kali ha Nongspung, ka West Khasi Hills ha kane ka sngi u Blei ba la dep katba ki dang thmu ban leit sha ka jingialang ka Balang Presbyterian ha Nonglang. Ha kane ka jingleit jngoh u Conrad u la kynduh ia kiba thiah pang bad u la iakren bad ki, bad u la kyntu ia ki doktor bad ki nurse kiba peit bad sumar ia ki ban leh ia kaba bha tam. Ha ka jingkylli u Conrad, ki doktor kila iathuh ba ar ngut kiba mynsaw jur ki la khlad noh katba sa ar ngut ki dang don hapdeng ka jingshitom jur katba kiwei ki la kham biang.
U Conrad u la pynpaw iaka jingsngew nguh ia ki doktor bad ki nurse kiba la sumar ia ki bad kyntu ia ki ban iai bteng ban ai ia ka jingshakri kaba bha tam.
Ha kajuh ka por, u Conrad u la iakren bad ki bor pyniaid ka hospital ia ki jingeh ba kane ka jaka sumar ka iakynduh bad u la kular ba un iakrene bad ka sorkar pdeng.