Pynmih ka ICAR ia ki Lumsniang, ki sniang kiba bang doh

Shillong, 6 Lber:
Ka tnat rep jong ka sorkar India, ka ICAR na Umiam, ka la pynmih ia ki sniang, kiba ki la ai kyrteng ki sniang Lumsniang, ha kaba la pyni paidbah ia kitei ki sniang mynta ka sngi, ha ka jingdon ryngkat jong U Dr. H Rahman, Deputy Director General (Animal Science) ICAR, New Delhi; U Dr. R S Gandhi, Assistant Director General, ICAR, New Delhi, U Dr. S V Ngachan, Director jong ka Institute; U Dr. B C Deka, Director, ATARI, Zone III, ha ryngkat bad kiwei pat ki ki nongmihkhmat jong ka sorkar Meghalaya.
Kitei ki dei ki sniang, kiba la pynkhleh lang hapdeng ki sniang shnong lane ba ki ai kyrteng Sniang Megha bad ki sniang Hampshire bad la pyniakhleh, da 25 percent ki sniang shnong bad 75 percent ki sniang Hampshire. La iathuh ba ka ICAR, ka la iaid ia katei ka jingthmu jongka, la 25snem kynthih bad ha katei ka jingiaid lynti ka ICAR, ka la lah ban pynmih ia kitei ki sniang, ha kaba ki la ai kyrteng ruh ia ki “Lumsniang”.
Kitei ki sniang, ki dei kiba la pynmih, katba kum ka jinglong jong ki sniang kiba don sha kane ka thain, kiba kha ia ki khun sniang kiba kham heh bad kiba don ruh ia ka doh kaba kham bha bad kaba kham bang, ba ki briew jong kane ka thain, ki ia bang bha ban bam doh. Kitei ki sniang, ki lah ban khia hapdeng ka 90 haduh ka 100 kilo ha ka rta kaba khad ar bnai bad ka dor die jongki, ka poi sha ka T.11000 haduh T.13000 uwei u sniang, kaba la heh dor ar shah, na ka dor jong ki sniang Khasi, kaba long hapdeng ka T.6,000 lane T.7,000.