Ngam riewspah na ka jinglong MLA, ngam tuh shi naia ruh: Embhah

Shillong, 5 Lber:
Ka jingwan ka jingiaseng Synod ha Mawlai ka la long ka jingkyrkhu ia ka shnong Mawlai Umshing naba katei ka shnong kaba dang duna bha ha kiba bun ki liang naduh ki surok, ki lynti iaid kjat, ki umbam umdih, bording bad kiwei hynrei mynta shi taiew shuwa ban sdang ka jingiaseng Synod katei ka shnong ka la ioh ia kiba bun ki kam pynroi. Ki paid nongshong shnong ka Umshing ki ju mad jingeh khamtam ha ka por lyiur naba ki hap ban iaid kjat lyngba ki lynti iaid kiba ktieh, hynrei mynta katei ka shnong ka la ioh lai tylli ki lynti iaid kjat bad ka surok kaba shi kilomitar eiei kaba la mang pisa T.3 klur tyngka. Ia katei ka kam la pyndep wut wut, namar ba ha ka sngi u blei kata ha ka 12 tarik kan don ka jingiaseng Synod ha Mawlai.
Ha ka sngi saitjaiñ jong ka taiew u MLA ka Mawlai u bah Embhah Syiemlieh u la plie ia ka surok bad ki lynti iaid kjat. U MLA u la pynpaw ia ka jingsngewkmen namarba la lah ban pynurlong ia baroh ki kam pynroi kiba dei ban poi ha Umshing shuwa ka jingiaseng Synod. “Kine baroh ki wan urlong dei ka jingiatreilang na ka Dorbar Shnong, ka Balang Presbyterian bad nga u MLA, dei lyngba ka jingisynei u Blei baroh ki jingpynkhreh ia kane ka jingiaseng Synod ki la dep pura ha ka por kaba biang bad kynthup ruh ia ka jingbiang ia ka umbam umdih da ka tnat Water Resources kaba la pisa T.35 lak bad ka jingpynbiang ia ka bording elektrik da ka tnat Meghalaya Energy Corporation Limited (MeECL)” ong u bah Embhah Syiemlieh.
U bah Embhah u la ong ba haduh mynta ka sorkar ka dang pyllait pisa dang T.1 klur tyngka bad ka dang sah sa T.2 klur tyngka hynrei u la pynpaw ka jingsngewkmen, namar ba ki konktraktor kiba trei ia ka kam ruh ki la shim ia ka jingkitkhlieh ban pyndep noh, wat la ka sorkar ka don hapdeng ka jingkyrduh pisa. Shuh utei u MLA ka Mawlai u la ong ba naduh u snem 2013 haduh 2018 ka pisa na ka MLA Scheme kaba T.7 klur tyngka un theh lut sha ki paidbah ka konstitwensi na bynta ki kam pynroi bapher bapher ha Mawlai bad sha ki longing kiba duk. “Ngam shym la riewspah na ka jinglong MLA bad ngam shym la tuh wat tang shi naia ruh na ka skhim MLA ne MDC, nga sngewhun ka mynsiem bad nga ioh thiah suk ha ka por mynmiet naba nga la pyndonkam hok ban sam lut ia ki skhim u paidbah” ong u bah Embhah.
Lah ban kdew ba ha ka jingplie ia ka surok bad lynti iaid kjat la donlang u bah CS Khongsar, Rangbah Shnong ka Umshing, u Pa’iem Ricky Nelson Syiem, Acting Syiem ka Hima Mylliem, u Tbn Dr. BR Kharlukhi, u Bah V. Nongdhar, Secretary ka Dorbar Shnong Umshing, u Bah BR Kharmujai, Rangbah Shnong Mawlai Mawdatbaki, Dr. Marco Mitri, Rangbah Shnong Mawlai Kyndon Massar, Bah IR Kharshyndon Rangbah Shnong Mawlai Mawtawar, Bah Kynsai Lyngdoh, Vice President ka Mawlai Town Dorbar, ki Engineer ka tnat PWD bad PHE ryngkat ki trai jaka.