Pyrshah ki Sordar, ban kylla kyrteng ia ka Hima Raidmynsaw

Nongstoiñ, 5 Lber:
U Sirdar jong ka Hima Raidmynsaw bah Hindro Samakha, hadien ba u la ïoh jingtip halor ka jingthmu jong ka District Council ban pynkylla biang ia ka Hima Raidmynsaw Sirdarship sha ka Hima Nongmynsaw Syiem Ship, ha ka sngi Thohdieng ba ladep, u la lum lang ia baroh ki Nongsynshar shnong bad ia u paitbah ka thain ha iew Langpih ban iapyrshah halor ka jingthmu jong ka KHADC ban pynkylla biang ïa katei ka Hima Sirdar sha ka Hima Syiem.
Na ka liang jong ki paitbah ha katei ka jingialang ki la pynpaw ïa ka jingpyrshah kaba jur bad ha katei ka jingialang da kawei ka sur ki la ia rai ba kin ym pdiang satia ia katei ka jingthmu ka KHADC, bad ki la ong ruh ba naduh u snem 1979 haba ka sorkar Assam ka la sdang ban wan thombor ïa ka khyndew ka shyiap bad ki jaka puta jong ka Hima Raidmynsaw bad wan buh ruh da ka ktem pulit ha Langpih bad Mawsikar ym shym la don mano mano ba ïarap lem hynrei dei tang ki paitbah ha ryngkat ki nongsynshar shnong kiba la ïakhun dohïap.
Shuh shuh ha katei ka jingialang ki paidbah ki la rai ruh ba lada ka KHADC ka shu thom da ka bor khlem ka jingmynjur jong ki nongsynshar shnong bad ki paitbah ban pynkylla biang ia katei ka Hima, na ka liang jong ki kim banse ban tur sha ka ophis jong ka District Council ban pynpaw ïa ka jingpyrshah bad ban pynlong ruh da ki jingïakhih kiba tyngeh.
Haba iaphai dien khyndiat ha ki snem ba la lah kata naduh u snem 2009 ha ka por ba u Bah K.P.Pangñiang u long kum u EM Elaka ha ka District Council la ithuh ïa ka Raidmynsaw kum kawei na ki Hima Sirdar ba dang pynkha thymmai bad la dep mynjur ruh da ka Council bad baroh ki jingthoh jingtar kiba ïadei bad ka jingïakren halor u pud u sam hapdeng ka sorkar Meghalaya bad Assam, ki la ïaid kat kum ka kyrteng ba la ithuh da ka KHADC bad ka sorkar jylla.
Ha kaba iadei bad katei ka jingthmu jong ka KHADC, ban pynkylla Hima Syiem ia ka Hima Sirdar na ka liang jong ki nongthoh khubor kila iohlad ruh ban iakren bad u MLA jong ka thain u bah K.P. Pangniang u ba dei ruh artad kum u nongai buit (Adviser) jong ka Hima ha kaba u la ong ba ka thain Langpih bad ka Hima Raidmynsaw, hi ka ju don ka jingiakajia ha pdeng ki Khasi bad ki Nepali, hynrei lyngba katei ka jingthmu jong ka KHADC kan sa pynmih pynban ka jingiaklumar para Khasi ym shuh bad ki Nepali. Shuh shuh U bah Pangñiang u la ong ruh ba lada u Bah P.N.Syiem kum u CEM ka KHADC u pynkylla ïa ka Hima Raidmynsaw Sirdarship sha ka Hima Nongmynsaw Syiemship u la dei ban pynim biang ïa baroh ki Hima Sirdar kum ka Jyrngam Sirdarship, Nonglang Sirdarship, Riangsih Sirdarship kum ki Hima Syiem bad ba ka synshar khaddar ka rukum thung Syiem ka dei ban long kum ha ki por mynhyndai hynthai bad ka District Council kam dei shuh ban tuklar ha baroh ki bynta.