Khanglad ia ki mynder, ong U MLA ia ki Hindu Nongpoh

Nongpoh, 05 Rymphang:
U Dr. D.D Lapang, Chief Adviser ka sorkar jylla, hynnin ka Sngi Saitjain ha ka jingialang kaba la long ha Sajer Community Hall, Nongpoh, u la lah ban pyllait paidbah bad aiti ia ka Kali kit metiap (Mortuary Van) sha ka Hindu Welfare Society Nongpoh, ia kaba la mang tyngka lyngba ka skim SRWP ha ka jinglut kaba T. 8 lak,
Kum ban shu ong hangne, baroh shikatta ki paid Hindu hapoh ka shatri jong ka Hindu Welfare Society Nongpoh ha ka thain Nongpoh, ki shem jingeh bha haba don ki jingiap briew namar ka jingbymdon ki kali ki ban kit ia ki metiap sha ki jaka ‘Thangbriew’, hynrei mynta pat katno kan da long ka jingkmen kaba khraw, namarba ki la ioh ia katei ka kali kit matiap.
Haba kaba pyllait paidbah ia katei ka Kali kitmetiap, la sakhi ruh da ka jingdonlang u Bah C.B Syiem, Chairman ka Nongpoh Town Committee, u Bah S. Mynsong, Rangbah shnong ka Nongpoh Proper, ki nongialam ka Hindu Welfare Society Nongpoh lem bad kiwei de ki riew rangbah ka thain.
Haba ai jingkren ha katei ka sngi, u Dr D.D Lapang, u la ong kumba ka sorkar ka la shimkhia ban pynioh ia kaei kaba la donkam da ki paidbah, kumta u la ban jur ia ki nongpyndonkam ia katei ka kali kit metiap ba ki dei ban sumar bha ia ka, khnang ban kan long ka jingmyntoi kaba khraw ia ki paidbah ba bun balang.
U la iaroh halor ka jingiatylli bad jingkloi jong ki paid Hindu kiba don ha Nongpoh, na ka bynta ban tei ia ka bha ka miat ha ka thain Nongpoh, ha kajuh ruh ka por u la kyntu ia ki briew ka Hindu Welfare Society Nongpoh, ba kin iatreilang na ka bynta ban iada ia ka jingwanrung kyrthep jong ki mynder ha kane ka jylla bad ba kim dei ban pynshlur ne ai jaka rieh ia kiwei pat ki mynder kiba thmu ban wan bsuh khlieh ha kane ka jylla.