Haei ngan shong, ha ka liangpyrshah ne ha ka liangsynshar?

Shillong, 03 Lber:
U Bah Pynshngain N Syiem u MLA ka Mawsynram u la pan jingshai na u Lamphang u AT Mondal, ka ing dorbar mynta ka sngi, la u dei ban shong ialade kum u dkhot ka liang synshar ne ka liang pyrshah,hadien ba u la shah sospon ha ka seng Congress, na ka bynta lai snem kynthih.
“Nga kwah ban tip, la nga lah ne em ban shong ha ka liangsynshar haba nga la shah sospon ha ka party, ka MPCC”, la buh jingkylli u Bah Pynshngain ha u Lamphang.
Hynrei na ka liang u AT Mandal, Lamphang ka dorbar Jylla, u la ong ba haduh mynta, um pat ioh pdiang jingthoh eiei na ka party Congress ba la sospen ne beh seng ia u Bah Pynshngain bad ka paw ba u Bah Pynshngain u dang dei u MLA ka Congress hapoh ka iing dorbar katba shabar u dei u MLA ba la shah sospon.
“Katkum ka rule, uno uno u MLA uba shah sospon, u lah ban shong lang ha ka liangsynshar haba u don ha ka liangsynshar hynrei lada u shah beh seng, yn sa ai jaka kyrpang”, la ong u Mondal jaba jubab ia ka jingwad jingshai u Bah Pynshngain.
Na ka liang u Bah Pynshngain u la pan jingshai na u Lamphang, ba kumno un shong ha ka liangsynshar haba u la shah sospon. “Kumno ngan shong ha ka liang ka liangsynshar haba la nga la shah sospon, haba ngam dei u MLA ka Congress?. Haei ngan shong, ha ka liang ka liangpyrshah ne ha liangsynshar?, la buh jingylli u Bah Pynshngain bad bynrap ba ka MPCC ka la sospon ia u naduh ka 14 tarik Nailur 2016.
Hynrei ha kane ka por, la ieng u Bah DD Lapang uba la ong ba ka ktien ‘sospon’ bad ‘beh’ ka iapher bad u Bah Pynshngain u shu shah sospon khlem beh seng. “Ka jingsospon ka dei kam iing ka party, bad u dang dei u MLA ka Congress”.