Khlad hashen 1, ba ban ka trok ia ka Auto ha 18Mer

Nongpoh, 03 Lber:
Ha kawei ka jingjia ba sngewsih kaba la jia hynnin ka sngi ha ka por 6 baje ei ei janmiet ha ka shnong 18Mer, Ri Bhoi District, ha kaba kawei ka trok kaba don ia u number AS 01 DC 3677, ka la kylla bad ban ia kawei ka Auto Rickshaw kaba don ia u number ML 10 A 8821 bad ha kane ka jingjia uwei u samla u la khlad noh hashen katba u wei pat u la mynsaw jur.
Katkum ka tyllong khubor na ki Pulit ka Ri Bhoi, la ong ba utei uba la khlad noh hashen la tip kum u Kitboklang Tangsang (18) bad utei uba la mynsaw jur pat la tip kum u Ehdawson Suting (22) kiba dei na ka shnong 18Mer.
Katkum ka jingtip ba la iohlum da Pulit ka Ri-Bhoi, la ong ba ka daw kaba la pynlong ia katei ka jingjia ka dei namar ka jingniah khlemakor da u draibar jong katei ka trok, namar ka jingniah stet ia ka kali tad haduh ba um lah shuh ban tehlakam.
Hadien katei ka jingjia, ki Pulit ki la pynkit noh ia ka metiap jong utei u samla ba la khlad noh sha Civil Hospital Nongpoh, na ka bynta ban leh ia ka Post Mortem bad kumjuh ia utei uba mynsaw la la pynkit noh sha NEIGRIHMS Shillong, khang ban ioh ia ka jingsumar kaba kham paka.
Shuh shuh, ki Pulit ki la iathuh ruh ba u tei u draibar jong katei ka trok u la phet krad noh na katei ka jaka, hynrei tang hadien katto katne por u la leit ban pyndem noh ialade hakhmat ki pulit ka Byrnihat Police Outpost, kumta haba iadei bad kane ka jingjia na ka liang ki pulit kin dang pynlong iaka jingtohkit halor katei ka jingjia bad ruh ban pynngat ia utei u draibar jong katei ka trok ha ki kyndon ka ain namar ka jingniah khlemakor.