Ha u Lat pynsngew ka Seng Khasi ia ka hok ki rit paid

Shillong, 03 Lber:
Ki nongïalam ka Seng Khasi Seiñ Raij, ha ka sngi ba-ar jong ka taïew, ki la pynsngew hakhmat u Lat jong ka jylla u Banwarilal Purohit haba ïadei bad ki hok kaba ki rit paid (minority) ba dei ban ioh kat kum ba la pynkhamti ha ka riti synshar jong ka ri.
Ia kane ka jingleit ïakynduh la don lang u Rgh Bantei S. Rumnong bad Rgh Arwan. S Tariang kiba long President bad Secretary ka Seng Khasi Kmie, ryngkat u ma O.R Challam President ka Seiñ Jowai bad u Warai Kharbuki.
Ha kane ka jing ïakynduh ïa u Lat, ki nongïalam ka Seng Khasi bad Seiñ Raij, ki la pynsngew ha u Lat ba lada ka sorkar jylla kam kloi ba kan ithuh ïa ki paidbah ba dang bat ba dang snoh ïa ka niam tynrai niam tre, kan sa poi ka por ba kan sa duh sa dam syndon ka jaidbynriew hi baroh kawei.
Katkum ka riti synshar jong ka ri, ha ka artikle 29 (1) bad 29 (2), ka pynpaw ba lada don kano kano ka kynhun ki paid nongshnong shnong kiba im ba shong bad ba sah hapoh u pud u sam jong ka ri, kiba don ïala ka jong ka ktien ka thyllieh, ki khana niam bad ki la riti kiba janai, kum kane ka kynhun ki don ka hok ban ioh kyrpang ïa ka bhah ba pule ba la ithuh da ka sorkar, ne ban ioh ruh ïa ka mang tyngka kaba pura.
Ka nongrim ba pynlong ïa ka Seng Khasi bad Seiñ Raij ban dawa ïa kane ka hok ban ithuh noh kum ki rit paid ha ka jylla ka long halor ka “T.M.A. Pai judgment, the Niam Khasi – Niam Tre fall squarely within
the meaning of Article 29 (1), 29(2) and 30 (1)”, ïa kaba ka sorkar jylla tad haduh kine ki sngi kiba mynta kam shym la treh ba kan ithuh ne pdiang ïa ki paid riew ngeit jong kine ki ar tylli ki Seng Niam kumki rit paid.
“Pynban ka sorkar ka jylla kam shym la sngap ïa kane ka jingdawa ka jong ngi ki seng niam , da kumta ngi na ka liang ka Seng Khasi bad Seiñ Raij ngi la ïaid noh shakhmat ban seng ïa ka synjuk kaba tip kum ka ‘Forum for Rights and Justice’ ha kaba ngi la ujor shi sydon da ka Public Interest Litigation (PIL), ha ka Meghalaya High Court” la ïathuh ki ïalam ïa u Lat.
Ha kaba kut ki ïalam jong kine ki ar tylli ki seng niam ki kyntu ïa u Lat ba na ka liang ka jong u ban ïarap ba un shim khia lem ïa kane ka kam ba la sahkut sah hajuh, haka juh ka por ba un ïarap naka bynta ba un pynurlong noh shi syndon ïa kane ka kam, kaba long kat kum ka riti synshar jong ka ri.