Kem ki pulit khlaw 7ngut, ki nongsiat mrad na ki thain Mawdem

Nongpoh, 01 Lber:
Ki Pulit syntiat khlaw na ka tnad Wildlife jong ka Jirang Beat ba hap ha Nongpoh Wildlife Range, hynnin ka janmiet ha ka por 7. 30 baje janmiet, ki la ioh ban kem haduh 7 ngut ki nongsiat mrad beain bad ki la ioh ruh ban kurup haduh 5 tylli ki suloi, na kawei ka jaka kaba la tip kum ka Sdat Umphuit (Umiewsier), kaba don ha ki thain Mawdem, Ri Bhoi District.
Kitei ki 7 ngut kiba la shah kem, ki kynthup ia u Bah Ophrin Rynta-thiang, u Bah Phrangsngi Kurbah, u Bah Lidra Kurbah, u Bah Dilip Kumar Kharthangmaw, u Bah Lingstep War, u Bah Starbor Kurbah bad u Bah Khlur Kurbah, baroh ki dei na ka Shnong Jabar ba hap ha Sohiong Police Outspost, West Khasi Hills District, katba kitei ki suloi kiba la ioh ban kurup ki kynthup ia 2 tylli ki suloi SBBL, 2 tylli ki suloi DBML bad kawei ka suloi SBML.
Ym tang katta, hynrei na kitei kiba la shah kem, la ioh ruh ban kurup haduh 2.30 KG ka Doh Skei ba la tyrkhong, saw tylli ki kjat skein, kawei ka Khlieh Skei, ka snieh Skei ba la pyniap da kitei ki nongsiat mrad beain. Kiwei pat ki tiar kiba la ioh ban kurup ki kynthup ia ki shira bakhor, ki sisa, ki tickly, ki wait bad tari, ki Torchlight, bad ki Kuli Suloi ba dang treikam.
Haba kren sha ki Nongthoh khubor ha Nongpoh, u Bah Teibor Lyngdoh, Beat Officer ka Jirang Beat, u la ong ba ka jingioh ban kem ia kitei ki nongsiat mrad beain, ka dei hadien ka jingiai buddien kaba la kham slem, namar kitei ki briew ki dei ruh kiba ju mlien ban wan ban beh mrad ne siat mrad ne siat beain ia ki mrad kiba don ha ki khlaw jong katei ka thain.
Shuh shuh, u la ong ruh hadien kane ka jingioh ban kem ia kitei ki nongsiat mrad beain, na ka liang ki bor ba dei peit kin sa pynlong ruh ia ka jingtohkit kaba jur bad khamtam eh halor ka jingpyniap ia katei ka Skei.
Kumta, hadien ba la dep ban tohkit ia kitei ki nongsiat mrad beain, mynta ka sngi na ka liang ka tnad Nongpoh Wildlife Range ka la leit ban aiti noh sha ka Disrtict Court, khnang ba kin bishar bad ruh ban pynshitom katkum ki kyndon jong ka Wildlife Act, u la bynrap.