“U Bah UN Sun” 3snem kynthih, ha ka jingthiah pang “Ngam lah ban pynkhih ia ki shympriah kti, ngam lah ban tem”

Shillong, 2 Nailar:
‘Jalieh- jalieh jadoh- jadoh phi tang shu ang lah ioh’ ‘u kwai ba ai ma phi katno jingbang ha kato ka sngi, ba ngan nguid ruh ngam kwah, ban kbum sah ruh ngam lah, haduh mynta nga kynmaw sah’ ki dei ki kyntien jingrwai kiba pynkynmaw ieit ia U Bah UN Sun, uba lehse ki paidbah ieit jingrwai ki dang ia lyngngoh ha kine ki sngi, ba kim ju ioh sngew shuh ia ki sur ba bang ba ih, na utei u nongrwai, uba la snah bha jong ka Ri Khasi.

Haba U Rupang, ula ioh jingtip, ba U bah Eubard Sun, um don satia ha ka met ka phad kaba khlain, la kham slem, kumta mynta ka sngi, ula ioh lad ban iakren bad utei u rangbah, uba don ha ka jingthiah pang jong bad haba la kylli, la u sngew kumno halor ka jingbym ioh lad shuh jongu ban rwai la katto katne snem, U bah Sun, ula jubab “Nga sngewsih kein, ba ngam ioh pynmih ia ka album. Ka daw kaba la pynlong ianga kumne, ka long ba ka trei ka jingshitom ha ka met jongnga naduh u snem 2010. Nga kyllon hangthie hapoh Police Bazaar”.

Wat la U bah Sun, u don ha ka jingthiah pang ialade, hynrei, haba la kylli, la u don ne em ki sur kynud myllung, kiba u sahnud ban pynmih pyrthei, ula ong “Ki jingrwai ki don hi katto katne kiba nga lah don ha ka khlieh jongnga. ‘Hynrei mynta ngam lah satia ban pynkhih ia ki shympriah kti jongnga. Ngam lah ban tem kaitar”. “Ngam lah ban leh eiei, ha ka jingim jongnga, nga hap ban shu thiah beit ialade ha jingthiah” ula ong shuh shuh. Hynrei ha kajuh ka por, u ai mynsiem pat ia kito kiba ieid ba thoin ia ki jingrwai jongu, da kaba ong ba ynda ula jem, un sa sdang biang ia katei ka kam rwai, namar ba ka kam thaw jingrwai ha u, kam long kaba eh, ba ka shim por tang shisngi ar sngi ia kawei ka jingrwai.

Na ka liang jong kito kiba ieid ia ki jingrwai jongu, ula ong u bah Sun “Kin sngewbha ban iai shah shitom, namar kan sa don ka lawei ba phyrnai ha ka jingim jongnga”.

Haba la kylli pat, la ki ju don ne em kiba ieid ia ki jingrwai jongu, kiba la leit iakynduh ban ai mynsiem ia u; U bah Sun, ula jubab “Ki don hi ki paralok jongnga katto katne, kiba shait wan iakynduh ianga, kiba iohi, ia ka jinglong ka met jongnga, ngam lah wat tang ban leit sha iing shet ja ruh”.
“Nga la thrang eh ban bteng biang ia ka kam rwai kaba nga la sangeh la 3 snem mynta namar ka jingban jur ka jingshitom, Ho,oid ki la don bun ki jingrwai kiba dang don ha ka khlieh jong nga , sngewbha iai ap shitom” ong u Bah Eubard Sun uba la ju ai kyrteng ieit ialade u Bah U.N Sun ha kaba u la kyrpad ruh ia ki paidbah ba kin sngewbha ban iai ap shitom tad haduh ba un da lah ban khie na jingthiah ban ieng biang ha ka rynsan kaba u ju don.
Haba ia kren bad u Rupang u Bah Sun u la iathuh ba ka jingpang ka la ktah ia u naduh ka snem 2010 ha kaba u la leit ban shah sumar ha kylleng ki Hospital hangne ha nongbah Shillong ha kaba mynta utei u nongrwai u la kham ioh bor hadien ba u la mih na NEIGRHIMS. “Ngam tip briew ia lade nga poi haei bad don ki por ba nga sngewba ka jingiap ka la wan rong ia nga” iathuh u Bah Sun da kaba batai ba ha ka jingthiah pang kaba um tip briew u la iohi ba u la poi ha ka pyntha phlang ba jyrngam bad hangta ka jingiap ka la khreh ban wan shaw ia u bad “Ha kum katei ka por nga shu pyrta Blei ha lade marwei ban iarap bad ynda nga la kyndit nga shem pynban ba nga don ha jingthiah” bynrap biang utei u nongrwai uba la pynmih shibun tylli ki album jingrwai bad kumjuh ruh ki phlim Khasi.
Ha ka rta kaba 35 snem tam, u Bah Sun u la pynmih shibun tylli ki kaset jingrwai Khasi, ki jingrwai album bad ki phlim Khasi. U la sdang ia katei ka kam rwai ha ka snem 1989 mynba u dang shong ha ka klas X, ka jingrwai ba nyngkong eh jong u ka dei ka dei ka ‘Er Pyngngad ki Aw’. Ka phlim ba nyngkong eh kaba u Sun u la pynmih ka dei ka ‘Khunswet ba shempap’ ka phlim Khasi kaba iaid iew bha ha kine ki khyndiat snem ba la dep bad kaba khadduh eh ka phlim jong u ka dei ka ‘Ieit ha ban da bieit’.

Haba la kylli ba kum u nongrwai uba im ja kpoh na ka kam rwai hato haba ban ka jingpang katne kumno u thawlad ban sumar ialade bad mano ba iarap ia u, u Bah Sun u la iathuh ba katba dap ka pisa kaba u la kynshew na ka jingioh kamai ha ka por ba u dang khlain u la pynlut ha ka jingsumar ialade bad la iaraplang ruh da i kiaw jong u. “Ym don nongiarap ia nga, nga la pynlut ban phah sumar ialade katba don ki pisa ba nga la kynshew na ka kamai ba nga la ioh ha ka por ba nga dang khlain, i mei ruh i iarap ia nga (kaba thew ia i kiaw jong u)” iathuh sngew myllung u Director ka Khunswet shempap, Lai ki Mynsiem, jingim ha u lyoh ba dum bad kiwei.

U bah Sun, u iathuh shuh shuh, ba haduh mynta, ym pat don satia mano mano na kiba ieid ia ki jingrwai jongu, lane na kano kano ka kynhun bad ka seng, kiba la mih ban ia noh synniang lem, na ka bynta ka bai dawai bad ka jinglut jingsep, ha kaba phah sumar ia U bah Sun.

[Na ka liang jong U Rupang, u kwah ban pynsngew ia ki nongpule baieid jongngi, lada ki kwah ban kitbok ba U bah UN Sun, un jem noh, ba kin phah da ka jingthoh lyngkot ha ka mobile jong U Rupang 80147 42583 bad ngin sa pyntip sha utei u rangbah]