Ka wah Umngot, ka khring bha ia ki nongwan jngohkai pyrthei

Jowai, 1 Lber:
Ki bynta ka wah Umngot ha West Jaintia Hills, naduh ka Shnongpdeng, Dawki ki dei ki jaka jngohkai kiba la khring bha ia ki nongwan jngohkai pyrthei na bar jylla bad kumjuh na bar ri bad mynta ka kynti pat ka Darang ruh ka la sdang ban paw pyrthei na ka bynta ban khring ia kane ka kam jngoh kai pyrthei.
Ka shnong Darang kaba don marjan bad ka shnongpdeng ka don ka jaka kaba itynnad bad da ka jingshimkhia u DC barim, u Arun Kumar Kembhavi bad ruh da ka jingtrei shitom ki samla ka shnong lyngba ka jingaibor jong ka Dornar Shnong, la seng ia ka Darang Tourism Promotion and Development Society (DTPDS) na ka bynta ban kyntiew ia ka kam jngohkai pyrthei kaba dei ruh ka karkhana ban kyntiew ia ka ioh ka kot ki nongshong shnong
Ka Tamasa Tlang: Mynhynnin ka sngi ha katei ka shnong, la pynlong ia ka Tamasa Tlang ia kaba la tip ruh kum ka Winter Tourism Fest. Ia kane ka Tamasa la bei pisa da ka bor District haduh 1.90 lakh da ka jingiatreilang ka tnad shang pyrthei bad kumjuh ka bor Sub-Division Amlarem ha ryngkat ka DTPDS.
“Ka jingthmu jong ngi ka long ban wanrah ia ka lad iohkam iohkam ia ki para shnong para thaw khamtam eh ia ki samla ba la nang la stad ba kin lah ieng ha la ki jong ki kjat”, la ong u Chairman ka Society, u bah Reachingson Kongwang.
“Ka kam sorkar ka long kaba eh bha ban ioh ha kine ki sngi bad kum ki samla kiba don ka jingkitkhlieh ngi hap ban wad ia ki lad ki lynti ban ieng hala ki kjat lajong”, u la bynrap .
Ha ka jingialang shwa ban sdang ka tamasa, u ADC, bah DM Wallang u la ong ba ka donkam ban don ka jingkit khlieh na ka bynta kane ka kam, ym tang ban pdiang bad ban pynbiang bam ia ki nongwan jngohkai, hynrei kaba kongsan eh ka long ban iada ia ki na kano kano ka jingjia kaba sngewsih.
U Kongsan ha katei ka sngi, u long u Local MLA, u ma Stephanson Mukhim, U ma Stephanson Mukhim u la ai ka jingiarap pisa ia katei ka Society haduh kumba 3 lakh shiteng ban pyniaid beit shakhmat ia ka jingthmu ka society. Kane ka pisa ka long lynba ka skim SRWP.
Na ka liang utei u nongmihkhmat ka thain u la iaroh ia ka Society bad ia ka borshnong kaba don ka jingiatylli ban kyntiew ia ka shnong ka thaw.
U ma Mukhim u la plie pyrda ruh ia u maw ba la seng nongrim ia ka Darang Tourist Spot mynta ka sngi ha katei ka Shnong.
Kiwei pat kiba la kren ki kynthup ia ka SDO, I Laloo, u SDPO, Jason Mairom, u Rangbah Shnong, u Chairman ka Society, U MDC ka thain, ma H. Pohthmi bad ka EAC, AMlarem ka kong Kharpuri nalor kiwei kiwei.
Ha kane ka sngi la sakhi ruh ia ka jingiakop kinglieng, iakop jngi, iakop ngam um bad kiwei kiwei ki jingialehkai kiba la ia shim bynta da ki samla bad rangbah kynthei bad shynrang.
Ia kane ka tamasa la sdang naduh ka 25 tarik bad kan kut ha ka 11 tarik u Lber ha ka shnong Borghat bad Kwator, East Jaintia Hills.