Ym thikna ka Block Mawlai, yn buh ha jaka ba biang ki paidbah:Mukul

Shillong, 28 Rymphang:
Ka sorkar kam pat pynthikna ba kan buh ne ai kyrteng da ka Mawlai Block ha Mawlai haduh mynta bad katkum ka jingkren jong u Mynri Rangbah u Dr Mukul Sangma, ka sorkar kan sa rai shen.
Haba kren mynta ka sngi, sha ki lad pathai khubor hadien ba la wai ka jingialang ka kynhun myntri, u Dr Mukul u la ong ba ka sorkar kam pat rai satia ban ai kyrteng bad ban buh ia ka ophis ka Block kaba pyniakhlad na ka Mylliem Block.
“Ngim pat rai la ban ai kyrteng thymmai ne em”, la ong u Dr Mukul haba kylli shaphang ka Mawlai Block.
“Ngi don ki shnong kynthup ka Mawlai, Pynthorumkhrah bad ka Nongthymmai. Ka jingkylli ka long ban ioh ia ka jaka kaba biang tam kaba iahap bha ia ka jingsuk jong ki paidbah nongleit nongwan”, la ong u Dr Mukul.
U la ong ba ym dei ban leh politik ia kane ka kam, hynrei dei ban iakren bad ban sngap ia ka jingkwah jong ki paidbah namar ba baroh ki paidbah jong ka Pynthorumkhrah, ka Nongthymmai bad ka Mawlai ki dei kumjuh ym don jingpyniapher.
“Kam don kano kano ka jingpyniapher ia ki paidbah jong ka Mawlai, Nongthymmai ne ka Pynthorumkhrah konstitwensi”, la ong u Dr Mukul.
Ka Mawlai Block ka dei kawei kaba iaknieh hapdeng u MLA ka Pynthorumkrah u Bah AL Hek u la dawa ba dei ban buh ha Mawpat katba u MLA ka Mawlai u Bah Embhahlang Syiemlieh bad u MDC Bah PT Sawkmie kiba dawa ba ka sorkar ka dei ban buh ha Mawlai.
Ha kawei ka liang, u Myntri Rangbah u la ong ba ka jingthung ia ki nongtrei ha ki Block thymmai la rai ban leh shwa da ka kontrak haduh ban da pynmih da ka jingpynbna da kumwei pat.