La ithuh kiba haiing ia ka met ka samla ba bret ha Dkhiah East

Jowai, 28 Rymphang:
Ia ka metiap jong ka samla kaba la lap na rud surok bah NH-44 ha Dkhiah East naduh ka 23 tarik une u bnai, la ithuh mynta ka sngi da kiba haiing hasem jong ka.
Ka jingithuh ia katei ka samla da kiba haiing hasem jong ka, ka la long tang lyngba ka dur kaba la phah da ki pulit lyngba ka Whatsapp na East Jaintia Hills sha Ribhoi District.
U SP ka East Jaintia Hills, u bah S Thamar, u la iathuh ba lashai ka sngi, ki ba haiing jong katei ka samla na Ribhoi District kin wan hi da lade ban pyntikna la katei ka samla kadei ka jong ki.
Na ka liang u  SP ka Ribhoi, u bah GD Kharwanlang haba iakren na Nongpoh, u la iathuh ba u kpa jong katei ka samla uba la tip kyrteng kum u Emer Kharthangmaw, u la wan ban pyntikna ba ka dei ka khun jong u kaba kyrteng ka Binora Dohtdong kaba dei na ka shnong Lympyllun, Umsning.
Ka tyllong khubor ruh ka la iathuh ba katei ka longing jong katei ka samla kaba la shah pyniap ka long kaba duk tasam bad ki la shym jynjar shi katdei ban kit ia ka metiap jong ka na Khliehriat sha Umsning na ka bynta ban pyndep ia ka niam ka rukom.
Kumban shu pynkynmaw ba ki pulit ka Khliehriat lyngba ka jingpyntip ki riew paidbah na ka shnong Dkhiah East ki la lap ia katei ka metiap narud surok bah NH44 ha ka por 5 baje mynstep ha ka 23 tarik une u bnai.
Ki pulit ki la suba ba ka lah ban shah bret nalor kali hadien ba la dep pyniap bad leh dusmon ia ka.