Kyllon iap U Commander In Chief ka UALA, lait phet 4 ngut

Shillong, 26 Rymphang:
Hadien shisnem duna 3 sngi ba la ia soi ia suk bad ka sorkar, u Commander In Chief ka  United A’chik Liberation Army (UALA) u Singbirth Marak ba ju khot sin kum u Norrok X. Momin u la kyllon iap ha ka jingiasiat ha ka miet sngi saitjaiñ bad ki pulit. Katei ka jingiasiat ka la jia ha ka por 7 baje mynmiet ha Thapa Matrongre bad ha Thapa Agisak kaba don hajan Resubelpara, North Garo Hills. Katei ka jingjia ka la jia katba ki pulit Special Force -10 Commando ryngkat ki pulit ki North Garo Hills ki la leit ban khynra lehnoh namarba ki la ioh jingtip na ki nongshong shnong ba ki don ki lehnoh kumba 5 ngut eiei kiba thap ban rahbor ia ki nongkhaii kwai ban dawa pisa.
Na ka jaka ba u Marak u la kyllon iap bad na ka met jong u ki pulit ki la ioh kawei ka AK ba shna ha China bad kawei ka pistol, ka khubor na ki pulit ka la iathuh ba saw ne san ngut kiwei pat ki la lait phet ha ka jingdum jong ka miet. Ka khubor na ki pulit ka la iathuh ruh ba ki la bthah ia kitei ki lehnoh ban ym phet bad ba ki dei ban pyndem ialade hynrei ha katei ka por ki la ther kuli kylla sha ki pulit bad ka la mih ka jingiasiat ba markylliang kaba la neh kumba 4 minit eiei bad ha katei ka jingiasiat u nongialam jong ki u la kyllon iap hashen. Ki pulit ki la ong ruh ba ki la ioh jingtip ba u Marak u thmu ban thaw noh da kawei ka seng kaba la saphriang ba kan dei ka United A’chik National Front ( UANF).
Lah ban kdew ba u Singbirth Marak u dei u Commander In Chief jong ka UALA hapoh ka jinglong Chairman jong u November Ch Marak uba ju khot sin u Chiindik bad la ong ba um sngewtynnad ruh ia ka jingpynbeit u Chairman katei ka seng ban ia kren ia suk bad ka sorkar ha u snem ba la dep hynrei katei ka UALA hapoh ka jingialam u Novembirth ka la iaid beit shakhmat ban ia soi ia suk bad la pyndep ia katei ka kam ha ka 29 tarik u rymphang, 2016 ha Dikki Bandi Stadium, Dakopgre-Tura ha kaba la don ka jingialang kaba heh kaba u myntri rangbah ka jylla u Dr.Mukul Sangma ryngkat ka kong Roshan Warjri myntri kam pohing ha katei ka por ki la leit ban pdiang sngewbha ia ki dkhot ba wan pyndem katei ka seng.