Ki sngi shuti, ki por sdang bad wai skul ki dei ban long thik kajuh

Shillong, 24 Rymphang: Ka sorkar ka la pynmih ia ka hukum ba baroh ki skul naduh ki Lower Primary (LP), Upper Primary (UP), Secondary bad Higher Secondary School ki dei ban bud beit bud ryntih ia ka hukum ia ka hukum ba ka la pynmih ha 6 tarik u Rymphang , 2017 na bynta u snem 2017-18.
Katkum katei ka hukum la kdew ba baroh ki skul ki dei ban plie skul naduh ka 16 tarik u rymphang, 2017, ka sngi shuti lyiur ka dei ban long beit thik naduh ka 29 tarik u jylliew, 2017 haduh ka 7 tarik u naitung, 2017 bad ki dei ban sdang skul biang ha ka 10 tarik u naitung, 2017 hadien ka shuti lyiur bad ka shuti tlang pat ka dei ban sdang naduh ka 16 tarik u nohprah, 2017 haduh ka 15 tarik u rymphang, 2017. Baroh ki skul sorkar bad ki bym dei sorkar ruh ki hap ban bud beit bud ryntih ia katei ka hukum.
Nangta katei ka hukum ka la ong biang ba ki skul Primary ki dei ban sdang naduh ka por 9:00 baje mynstep bad wai haduh 1:00 nohphai sngi, ki Upper Primary ki dei ban sdang naduh ka por 9:00 baje mynstep haduh ka por 2:30 baje nohphai sngi, ki Secondary School ki dei ban sdang naduh ka por 9:00 baje mynstep haduh 3:00 baje nohphai sngi bad ki Higher Secondary School pat ki dei ban sdang naduh ka por 9:00 baje mynstep haduh ka por 3:30 baje mynsngi. La hukum ba baroh ki skul ki dei ban bud beit thik ia kitei ki por sdang bad wai skul, ki por shuti bad ki por plie skul biang. Ia katei ka hukum la pynbna da u A.Ch Marak Director of School Education & Literacy, Meghalaya –Shillong katkum ka hukum jong ka sorkar ba la pynmih ha ka 30 tarik u kyllalyngkot, 2017 bad la phah kopi sha u Commissioner and Secretary sha ka sorkar jylla tnad pule puthi, sha u Dy.Commissioner, Sub-Divisional Officer (Civil), Jnt DSEL, DSEO, SDSEO ba kin pynbna sha ki skul bapher bapher.