Ym pat don ba wan kam ia ka met ka samla

Jowai, 24 Rymphang:
Ia ka met ka samla briew kaba la lap ba thiah iap harud surok bah NH -44 ha Dkhiah East hynnin ka sngi, ym pat don satia kiba haiing hasem ban wan kam ia ka.
Haba iakren bad ki pulit ka East Jaintia Hills mynta ka nohphai sngi, ki la iathuh ba ka metiap jong katei ka samla ka dang don ha jaka buh metiap ha Khliehriat CHC bad haduh mynta ka sngi ym pat don satia ba wan kam ia ka.
Kum ban pynkyn maw, ki riew paidbah ki la lap ia ka metiap jong katei ka samla lud kaba antad hadpeng 17 bad 20 snem ka rta ka la thiah iap harud surok bah hynnin ka sngi Palei. Ki riewpaidbah ki la pyntip mar mar sha ki pulit bad ki pulit ki la wan ban pyndep ia baroh ki jingdonkam katkum ka ain.
La suba ruh ba ia katei ka samla la shu bret nalor trok ne kali lane ka lah ban shu kynthih hi nalor trok ne kali.