Shim jingtohkit ka Committee ia ka Orderly Peon ka Soil

Shillong,
23 Rymphang:
Ka kynhun tohkit ba lai ngut ba thung ka sorkar ban tohkit ia ka jingkynnoh phah sahmiet ha jaka sah, ka la shim jingtohkit ia ka samla mynta ka sngi.
Kat kum ka jingtip ba la ioh lum, la iathuh ba ka jingtohkit kala shim jingtohkit ia kane ka samla halor kiba bun bynta kiba iadei bad kane ka kam bad la khmih lynti ba ka kaiphod jing tohkit kan sa paw shen hadien ba la pyndep ia ka jingtohkit.
Ka sorkar ka la thung ia ka jingtohkit hadien ba ka samla ba trei orderly peon ka la ujor pyrshah ia u Director ka tnad Soil and Water Conservation u Bah Donald Langstieh da kaba kynnoh ba u la phah sahmiet ha jaka sah jongu, kaba la pynlong ia ka ban nym kohnguh ia kane haduh ba ka la shah set tulop bad shah kynriah sha ophis ka Soil ha Byrnihat.
Hynrei na ka liang u Director u la kyntait ia kane ka jingkynnoh  da kaba ong ba u hap ban pynshitom ia ka namar ba kam trei bha ia ka kam ba la bynshet.
Katkum ka jingong u Director, ka la kyntait ban trei ia ki kamram jongka bad ka jingsngew ka long ban ai tulop ia ka nongtrei kaba kyntait ban trei ia ka kamram jongka, ka ktah jur ia ka jinglong jingman hapoh ka ophis baroh kawei bad dei halor kane ka nongrim ba la pynsangeh tulop shipor ia ka bad la pynkynriah kam ruh sha Conservation Training Institute, Byrnihat ha ka 8 tarik Naiwieng, 2016.
Kane ka jingleh ban pynbeit ia ka, ka long ban pynbeit ia ka jingleh sting jongka ia ka kamram kaba dei ka kyndon pyniaid kam ha ka ophis, da kaba shu ai ka jingpynsaja kaba jem da ka jingthmu ban pynbeit ia ki jingleh jongka, la ong u director.
Halor kane, ka jingshah set tulop kane ka samla ka la ujor sha u Principal Secretary ha ka 10 tarik Naiwieng, 2016 ha kaba u la ai ia ka jubab ha ka 20 tarik Naiwieng, 2016 bad la phah jingthoh sha ka Treasury ba kan pynlait noh ia ka tulop jongka.