Jurip surok ka KSU sha Mawkhanu, Jaroit

Mawryngkneng, 22 Rymphang:
Na ka liang jong ka KSU Mawryngkneng circle hadien ba ka la dep ban wan jurip ha u snem ba la dep ia ka surok PMGSY ba la shna na Mawkhanu , Jaroit shaduh Nonghali bad Mynriang, la lap ba ka surok ka long kaba sniew haduh katta katta  bad ka jing pyn suki u kontraktor ban pyntrei ia katei ka surok, ka la buh jingeh ia u paidbah haba bun ki liang khamtam ha ka ban pynkit ia kiba pang ba shitom sha Hospital bad ban pynpoi iaki mar rep shan Iew sha Hat .
Hynnin ka sngi ha ka jingialam u President ka seng u Samla Reallystar Nongspung, ha ka jing iadon ryngkat u Samla Vincent Makri Incharge ka KSU Eastern Central Unit, ka la leit ban ia kynduh ia u Executive Engineer ka PWD (PMGSY) halor ka jing sniew ka surok na Jaroit sha Nonghali Mynriang bad ka jing suki ban pyndep ia ka Surok ba la pyntrei lyngba ka skhim PMGSY kaba kot haduh 2 klur tyngka.
Ha katei ka sngi ka seng ka la dawa ba dei ban pyndep noh ia katei ka surok ha shwa ban poi ka lyiur khnang ba u paidbah un nym ia kynduh jingeh biang bad na ka liang u Executive Engineer ula kular ban pynsted noh ia ka kam bad ban pyntrei pyndep noh hapoh u bnai Lber mynta u snem. Na ka liang ka seng ruh ka kyrmen skhem ba ka jing kular u Executive Engineer kan urlong.