Long Hero sa ha ka jingkhuid bad ka jingbiang jingkheiñ, Pyniaid ia U CEM

Shillong, 22 Rymphang: Ka la pyndom pynbitar ia u bah Pynshngaiñ N Syiem CEM ka KHADC bad u la ong ba ka dei ka sngi kaba dum hapoh District Council naba ia ka NC la wanrah da ka liang synshar ym na ka liang pyrshah, u la kren siat ruh ia ar ngut ki MDC kiba don ha ka liang synshar kiba la wanrah ia ka NC kata u bah H.S Shylla bad u bah Pyniaid Sing Syiem MDC ka Sohryngkham.
Haba shim bynta ha katei ka jingiatai halor ka mat bym shaniah shuh ia ka Executive Commi ttee,u bah Pyniaid u la pynkynmaw ia u CEM ba la arsien u la wanrah ia ka Resolution ha kaba ia dei bad ka Gurudwara kaba don ha Them Metor bad u la ong ba ka jubab ba la ioh na u CEM ka long tang hapoh shi taiew un khot ia baroh ki MDC ban ia kren “Hynrei mynta la shisnem, ym pat don katei ka jingkhot” u la ong. Nangta u la bteng biang da kaba ong ba ha ka 21 tarik u jylliew, 2016 u la wanrah ia ka Resolution ia kaei kaba la jia ha Mawshbuit kaba ia tyngkhuh bad ki shipai Gorkha 58 GTC kaba la jia ha u lber 2016 hynrei ha katei ka dorbar ruh u la ong ba u ong ba un khot ban ia kren hynrei um shym la khot, bad na ka daw ba um khot u bah Pyniaid u la iathuh ba u hap ban ialam ia ki rangbah shnong bad ki paidbah sha ophis u CEM ban ioh jingshai bad hangtei ruh u la ong ba u CEM u la kular ba un leh eiei , “Hynrei haduh mynta ruh um leh eiei, ka samoi treikam jong ngi sa tang ar snem-kaei ka jubab ba ngin leit ai sha u paidbah, hato tang ka ishu MUDA, tang ka ishu rangbah shnong ka la biang?” buh jingkylli u bah Pyniaid.
Haba pynpaw ia ka jingsngewkhia halor kiwei pat ki mat kumba la kren da kiwei pat ki MDC ba kynthup ia ka Professional Tax bad kiwei ki jingpyndonkam bakla ia ka pisa ka Council utei u MDC na Sohryngkham u la ong biang, “Baroh baroh ki ia ong ia phi u Hero ba phi ia khun pyrsha ia u Dr.Mukul, ka donkam ba phin pyni ruh ba phi long hero ha ka jingkhuid jingshai ka rukom treikam bad ka jingbiang ki jingkheiñ jingdiah”. Haba kren shaphang ka jingkynthoh ia ka KHCF halor ka Monolith Festival u la ong ba ka la pynsngewsih ia u ban iohi ba ha ka por janmiet ha ka por ba pynlong ia katei ka tamasa ka la mih ka jingkulmar namarba nalor ki dukan ba la ai wai da ka dor la pynmih palat pynban ia kaba la mang ban buh bad katei ka jingleh ka la pynkhih ia ki nongshim wai haduh ba ki dawa ba dei ban pynphai biang ia ka pisa kaba ki la siew na ka bynta ban ioh dukan.