25 tarik jingialang ka UDP Mawkyrwat

Shillong, 17 Rymphang:
Ka jingialang jongka Executive Committee (EC) jong ka UDP Mawkyrwat Circle kan long ha ka 25 tarik mynta u bnai ha ka por 11 baje mynstep ha ophis jong ka Party ha Mawkyrwat kaba don hajan ka jaka ieng taksi kamai Rangmaw, Jakrem Mawten, ong ka kyrwoh khubor na u bah B Marbaniang General Secretary ka UDP Mawkyrwat Circle.
Ki mat ban iakren ha kane ka sngi ka long ban pynkhlain ia ka party, kata ban pynskhem ia ki nongkitkam jongki Zone, Primary Unit, bad sub unit bapher bapher bad kumjuhruh ban jied thymmai ia ki kam kiba thylli ha ki zone bad ki unit bapher bapher.
Ha kawei pat ka liang u bah Commander Shangpliang Chairman jong ka Economic Development Committee jongka UDP Mawkyrwat Circle, u la iathuh ba hadien ba la wai ka jingialang jong ka EC kan don ruh ka jingiakren halor ki mat lane ki ishu kiba ktah bad kiba ka Constituency ka donkam bad u la kyntu ia baroh ki nongkitkam jong ka party na ki Unit bapher bapher ba kin iawan ryntih bad ba kin wanrah ruh ia ki mat jingiakren kiba ktah ha ki dong bad ki jaka bapher bapher kathain khnang, ba ka Committee kan lah ban leit rah hakhmat ka sorkar bad kumjuh ruh ha kinongialam jong ka Central body jongka party ba kin iakren bad ka sorkar bad khamtam eh ban iakren ha kane ka dorbar mangtyngka ka ban sa long shen.