Kem ki pulit Nongstoin, ia 12 tylli ki trok dewiong ba buh challan thok

Nongstoiñ, 17 Rymphang:
U bah K. Sumer, Inspector ka tnad (DMR), u la ujor ha ki khyndiat sngi ba ladep, ba ki don kumba 27 tylli ki trok kit dewiong kiba kit dewiong, da ki challan thok bad halor katei ka jingujor, ki pulit Ka Nongstoin, hynnin ka sngi, ki la ioh ban kem ia kumba 12 tylli ki trok kiba don bynta ha katei ka jingpyndonkam da challan thok ban kit dewiong.
Kum ban shu pynkynmaw ba katei ka jingjia ka la jia ha ha ka 12 tarik jong u Kyllalyngkot mynta u snem ha kaba ki nongtrei ka tnad DMR kaba don ha Zero point Riangdo, katba ka dang peit ia ki challan, ki la lap ruh ba don ki trok kiba la pyndonkam da ki challan thok ban kit dewiong ba la ai kyrteng ha ki kyrteng jong ki katto katne ngut ki nongkhaii.
Shuh shuh hadien katei ka jinglap jong ki nongtrei ka DMR ia kitei ki trok ba pyndonkam challan thok na ka liang jong u bah K. Sumer, Inspector ka tnad (DMR), u la leit ban ujor syndon ha Riangdo Police Outpost ha ka sngi kaba bud kata ha a 13 tarik Kyllalyngkot 2017.
Na ka liang jong u SP Ka West Khasi Hills District, u bah S. Nongtnger haba iakren bad ki katto katne ki nongthoh khubor, halor katei la jingjia, u la ong ba hadien ba ki pulit ki la ioh ia katei ka jingujor na ka tnad DMR, ki la pynlong ruh ka jingthwet ia kitei ki trok bad dei ha kine ki khyndiat sngi ba la lah, ba ki pulit ki la ioh ban kem noh kumba 12 tylli ki trok.
Shuh shuh u la iathuh ruh ba hadien ba ki pulit ki la ioh ban kem ia kitei ki trok ki la pynhap noh ia u dewiong bad kurup ruh ia kitei ki12 tylli ki trok, hynrei hadien ba ki trai jong kitei ki trok ki la wamih na ka liang jong ka kashari, ka la pyllait noh ia kitei ki trok.