Ki ADC ki dei ban pan jingbit shwa na u Lat, ban pas ia ki Bill

Shillong, 1 Nailar:
Ki lai tylli ki Autonomous District Councils (ADCs) kim dei shuh ban shu pas ne pdiang ia kano kano ka bill, hynrei ki dei ban pan jingbit shwa na u Lat ka jylla shwa ba kin pas ia ki.
Kane ka jingbthah sha ki ADC ka la wan hadien ba ka KHADC kam shym la pan jingbit shwa na u Lat ka jylla shwa ban pas ia ka Delimitation Bill kaba la dep pdiang ne pas da ka iing dorbar ba long dang shen.
“Ngi la ong ia ki lai tylli ki ADC ba ki donkam ia ka jingbit na u Lat shwa ban leit rah ia kano kano ka Bill nangne shakhmat” la ong u myntri ba peit ia ka tnad District Council Affairs u Bah HDR Lyngdoh haba kren sha ki nongthoh khubor hadien ba la wai ka jingialang bad ki lai ngut ki Chief Executive Members (CEMs) jong ki ADC ha kane ka sngi Palei.
U la ong ruh ba ki ADC ha ki snem ba la dep, ki la iaid lait ia ki kyndon jong ka Sixth Scheduled kaba kdew shai ba ka Council ka donkam ban ioh jingbit shwa na u Lat haba ka kwah ban leit rah ia kano kano ka Bill.
“Halor kane ka jingbthah, ia ka Bill kaba la pdiang ne pas da ka KHADC ban pynduh bad ban pynkha thymmai ia ki MDC constituency kam treikam shuh. Ka KHADC kan hap ban sdang biang naba sdang ia kane ka Bill”, la ong u Bah HDR Lyngdoh.
U Myntri ka tnad DCA u la ong ruh ba ki lai tylli ki ADC la bthah ba kin ai ia ki jingtyrwa jongki ba ki kwah ban pan jingbit na u Lat bad ki dei ban phah sha ka sorkar bad kan sa phah pat sha u Lat.
“Lada donkam ka sorkar kan ai ia ka jingkynthoh halor ka jingtyrwa ba ki la phah shwa ban phah pat sha u Lat” la ong u Bah HDR Lyngdoh.
Halor ka jingthmu ban pynlong ia ka elekshon da ki MDC constituency thymmai, u Bah HDR Lyngdoh u la ong ba kane kan shong ha ki lai tylli ki ADC ba kin pynsted ia ka kam.
‘Ka rai kaba khadduh halor kane ka jingphiah ia ki constituency kan shong ha ki lai tylli ki ADC, ka sorkar jylla kam lah ban pynbor ia ki ADC watla ka kwah eh ban pynlong elekshon da ki constituency ba thymmai. Lada kano kano ka ADC ka rai ba ym donkam ban pynduh ne pynkha ia ki constituency, ka elekshon MDC lashem snem kan long kumba ju long da ki constituency barim” la ong u myntri ka tnad DCA.
U la ong ba kam don ka kyndon katkum ka 6th Schdeuled ba donkam ban thaw ia ka Delimitation Commission (DC). “Ka jingpynduh ne pynmih constituency kan shong ha ki ADC” la ong u Bah HDR Lyngdoh.