Shah pyniap u nongniah trok

Tura, 16 Rymphang:
Ka jingjia kaba shyrkhei shibun eh, ha kaba u nongniah jong kawei ka trok, uba 25snem ka rta, ula shah pyniap bad la lap ia ka met jongu, hajan Dollongre jong ka West Garo Hills, ha kaba la pom na ki bynta jong ka khlieh jongu. La iathuh ba utei u nongniah, uba la shah pyniap, dei U Ram Nath Rai
U Ram Nath Rai, uba dei na Samastipur na Bihar, u shong u sah ha Thakurbari jong ka Tura, u don ia ka jingmong kaba heh bha ha ka khlieh jongu bad kaba la pynpoi ruh ia u, shaduh ka jingiap. La iehnoh ia ka met, hajan katei ka shnong Dollongre, da ki nongpyniap jongu bad ka pisa lem bad ka mobile jongu ruh ka la jah noh. Ka trok, kaba u niah ruh, ka ieng ha rud surok bad la antad, ba la pyniap ia u mynta ka sngi dang step phyrngab.
Katei ka dei ka trok, kaba don ia u number RJ- 23GA 4335 bad ka dei ka jong uwei u heh spah, uba trei ia ka kam kit khaw bad ka Food Corporation of India (FCI) bad katei ka trok, ka ju kit khaw sha ki kudam ka FCI ha Tura bad Williamnagar.